Gou miz song daxboh: Boux ndeu dwg bohseng, boux ndeu dwg bohlaeng. Song daxboh gou cungj dwg bouxbing caemh seizdaih, ndang daenj buhbing, maenh’ak raixcaix, vifung dangqmaz. Boux ndeu vih laebbaenz Cungguek moq buekmingh hoenxciengq, boux ndeu youq gwnznamh Cauzsenh dingj bang bing Meijgoz gvaq. Songde cungj deng sieng gvaq, laeb goeng gvaq, dwg boux gwzming geq、gungcanjdangjyenz geq!

Bohseng gou heuhguh Liengz Cigiz. Youq mwh sam beixnuengx dou lij iq, de baenz bingh naek couh biek yahlwg bae lo. Daengx ranz vunz cungj simcieg yaek dai.

Youq ndaw gaijfang cancwngh, de mbouj lau dai, bonghfoedfoed gaj vunzdig. Miz baez ndeu, aen doihbing de deng vunzdig humx, yungyiemj raixcaix. De doq caemdingh roengzdaeuj, lumj duzmeuz nei bin hwnj gwnz ranzvax, ciengjciemq gij deihseiq mizleih, aeu cungq nyingz gyoengq vunzdig dangqnaj, yenjhu canyouj cung okbae. Laegfwngh, vunzdig fatyienh de lo, couh gyoebcomz nyingz coh de. De boux dog youq gwnz ranzvax doq ndoj doq nyingz cungq. Doeklaeng de deng vunzdig nyingz deng fajnaj, gyo ndaej miz boux canyouj gibseiz gouq de. Gvaqlaeng youq yihyen yw sieng, gij baksieng de ndei lo, hoeng gokbak de cix miz di mbit lo. Baenzneix, nyinhdingh de ndangcanz dwg sam gaep gyap daengj, caemhcaiq fat mbaw cingq bouxbing ndangcanz.

Daxmeh gou ciengzciengz gikdoengh dwen daengz bohseng gou——1949 nienz 2 nyied, de youq Bingzci Yen(seizneix Bingzgoj Si) cawjlig dadui dang duicangj caeuq fulenzcangj. 1949 nienz 6 nyied, aen budui neix caeuq vunzdig doxhoenx, gaj haujlai vunzdig, doeklaeng ndaej hingz. Bihaenx 10 nyied, Bingzci Yen Laemzseiz Yinzminz Cwngfuj laebbaenz. Youq baez hoenxciengq neix, bohseng mbouj lau dai saekdi, cung bae gonq, ndaej yinzminz cwngfuj ciengj hawj bak gaen haeuxhau. 1950 nienz 1 nyied, baihgwnz diuh bohseng daengz Vujmingz Yenveij guhhong. Youq Vujmingz, de baengh vunzlai, gaenxguh mbouj yiemz baeg, aeundaej cingzcik yienjda.

1952 nienz, de daj doihbing cienjnieb daengz Lingzloz Yen Gungh’anhgiz guhhong. De guh saeh lij lumj bouxbing nei, cienzmienh cingjceih gij cianh dangdieg, gaemh bouxfamhfap, bauj lwgminz bingzan, lwgminz dangdieg bouxboux haenhndei. De youq 1953 nienz、 1954 nienz laeb daihgoeng baez ndeu, ietdaengjgoeng song baez, bingjdaengjgoeng baez ndeu. 1955 nienz, de miznaj ndaej gyahaeuj Cunghgoz Gungcanjdangj.

1962 nienz, Lingzloz Yen baen yen. Bohseng diuh bae Lozyez Yen Gungh’anhgiz. Seizde, dangdieg miz doenghgij saeh hoj guh. Vihneix, dangjcujciz daegdaengq diuh de bae daengz Lozyez Yen Yajcangz Gunghse guhhong caemhcaiq giem guh baicuzsoj sojcangj. Bohseng dangsaeh gvaqlaeng, miz aen gunghse caeuq vunzlai dangdieg haeujcoengh, vaiqvit guhbaenz gij hongsaeh baihgwnz daengq, vih dajcauh aen vanzging ndawbiengz an’onj guh ok gunghawj moq.

Doeklaeng baihgwnz roengzlingh diuh bohseng dauq Lozyez Yen Gungh’anhgiz. Hoeng, seizde bohseng aenvih sieng gaeuq caiq fat caeuq ciengzgeiz guhhong dwgrengz lai couh bingh laemx le, bingh sikhaek bienq naek. 1963 nienz 8 nyied, de youq Nanzningz ciengjgouq lai baez, hoeng cungj mbouj miz yungh, doeklaeng lizbae lo. Bide, de ngamq ndaej 38 bi.

Dangseiz, dou sam beixnuengx lij iq, daxmeh mbouj miz hong cingqsik, dan baengh guh di honglingz gvaq ndwenngoenz. Ndigah, mwh bohseng youq Nanzningz ywbingh, cijndei dak boux Auseiq ciuqgoq de. Dou cungj liuh mbouj daengz bohseng baenzneix vaiq couh liz bae, yahlwg byawz hix mbouj ndaej youq henzndang de. Auseiq mbouj rox saw, baenzneix bohseng dai bingh le, de mbouj rox bohseng dou moek youq gizlawz. Baenzneix, dou itcig mbouj rox gizdieg bohseng ninz youq gizlawz. Cig daengz bi daihngeih gou guhhong le, youq Gvangjsih Bouxcuengh Swcigih Gungh’anhdingh bangcoh baihlaj, cij youq Gvangjsih Lezsw Lingzyenz ra raen aen moh bohseng. Saedcaih doiq mbouj gvaq bohseng ha!（1）