Bonjlaiz gou laihnaeuz Aulungz- gveiz vunz ndei, haemhlwenz dingq le gij goj de, engq hawj gou doengzcingz caemhcaiq gingqfug de. Seizneix, de gig haeksat fouzcingz, gou hix miz di dwgcaengz de lo, gvaiq mbouj ndaej vunzmbanj cungj gig haemz de, mbwq de, damh de!

Danghnaeuz gou dwg boux vunzhung, mwhneix—— aiq hax- baenh, gou gaenq bongh haeujbae vix ndaeng de ndaq de lo. Hojsik gou lij iq, de gaenbonj couh mbouj dawz gou haeuj da, seizneix de cingq simnyap, gou bongh haeujbae mboujdan gangj mbouj ok vah daeuj, dauqfanj deng de ndaq ndaej gyaeuj haeu, gou vihmaz gag bae ra hoj gwn ne?

Gou nyaenx roengzdaeuj, yaek lizhai gizneix, buet dauqbae lwnh hawj daiq.

“Ahbyauh!” Baihlaeng gou cienz daeuj gij sing hemq lumj byajraez nei, “daengx din!”

Ga gou miz saek mwnh, yaek buet cix buet mbouj ndaej lo.

Geij sing yamqdin naek daj laeng rwz cienz daeuj, laeng gou baez caep, baezneix yaek deng fangz lo, itdingh dwg Aulungzgveiz fatyienh gou caegdingq lo, de cingq hujdengdeng, Simjmehveij deuz lo, de mbouj aeu gou okheiq?

Gou caenh roxnyinh laeng rwz miz saek raq rumz iqet, aiq dwg gaemxgienz he roxnaeuz fajfwngz he hoenx gvaqdaeuj, gou vuengmuengz suk hoz, baez niuj hwet, ndoj fajfwngz de.

“Mwngz guh maz? Gou youh mbouj dub mwngz.”

Aulungzgveiz ndwn youq henz ndang gou, loq nyengh dwk muengh coh gou.

De deng gou loengh ngawh lo.

(caengz sat)