“Ndigah mwngz couh haq hawj bouxwnq lo? Ced vunz Buzsimjsam, meh gou doiq de ndei baenzneix!”

“Yienghneix mbouj ndaej gvaiq gou, cij ndaej gvaiq mwngz……”

“Gou vihliux mwngz gai reihnaz bae Yanghgangj, vihliux mwngz swz hong gig ndei maranz, byawz rox cingqngamj bungz bang caeggeq ‘Vangzvaizgvaiq’ haeuj mbanj, danghnaeuz seizde gou dingq gij vah meh gou, mbouj gag bae gyaep gyoengqde, yaek gouq gvan mwngz dauq, hix mbouj deng ienuengj baenz caeggeq lo——”

“Gaenq gvaq ndaej cib lai bi lo, seizneix byawz hix mbouj nyienh caiq dwen doenghgij saehgonq sim’in lo——”

“Vihmaz mbouj dwen? Nanzdauh gou yaek dawz mingzdaeuz haeu baenz ciuhvunz bae?” Aulungzgveiz yied gangj yied gikdoengh, yienznaeuz gou yawj mbouj raen naj de, hix liuh ndaej daengz gij saeknaj de, itdingh lumj duzyou ndawmiuh deng gij ien oenq nanz nei, dacaengz dwk, gij nyinz gwnzhoz doed dwk, song fwngz gaemh gaemxgienz, myaiz daj ndawbak sinz okdaeuj.

“Gou youq ndawlauz gyaeng le sam bi, sou byawz bae yawj gou gvaq? Daxmeh gou……” Sawqmwh, Au- lungzgveiz bingzseiz lumj ndaek rin hung nei giengiengz, gingqyienz hix daejiekiek hwnjdaeuj, gangj mbouj ok coenz vah he.

“Meh mwngz song baez bingh- naek, gou moix ngoenz cungj bae ganq de, hoeng——”

“Duznouguk daej duzgaeq, dwg simndei ha?” Aulungzgveiz fukdauq lo, “gou ndaej cuengq dauq, mbouj miz byawz doengzcingz gou, mbouj miz byawz yawj ndaej hwnj gou, gou itdingh aeu youq Mbanjgyaeujdah? Vihmaz? Mwngz naeuz, gou dwg vihmaz?

“Gou rox, gou rox gij simcingz mwngz……”

“Mwngz rox maz? Hei, gou ninz youq gij mbaeklae miuhsaenzvangz ndwen lai, hwnzngoenz deng rumz bongj fwn soen, duznyungz duznengz- nyaen haeb, mwngz rox? Danghnaeuz mbouj dwg bohgoux Ahbyauh naeuz aeu youq laeng miuh neix bang gou hwnj gan rug daemq he, gou lij ndaej lix daengz ngoenzneix? Mwngz rox maz?”

Gou seizneix cij roxyiuj vihmaz de lai gyaez gou, yienzlaiz dwg aenvih bohgoux gou bang de gvaq.

“Seizde bouxgvan gou youq gwnzbya gaenq baenzbingh lo, gou gawq aeu goq lwgnyez, youh aeu ganq vunzbingh, mbouj ndaej geij ndwen de couh dai lo…… Mwngz gag ngeix, gou baenzlawz lij miz rengz bae goq mwngz?”

“Gou aeu mwngz goq? Gou cijaeu ndawsim mwngz miz gou couh ndaej lo.”

(caengz sat)