Seiziq, dwg seiz dwggyaez caeuq seiz mizyinx, hix dwg seiz ciuhvunz nanzlumz. Seiziq, raeuz ngoenznaengz cungj guh aen gojgaeq gyaeundei. Duz nengziq ndeu, aen vanzgi ndeu, baez guhcaemz ndeu……Yawj hwnjdaeuj mbouj suenq gijmaz, hoeng cix hamzmiz gij vaiqvued、siengjmuengh caeuq gyaepgouz raeuz.

Geiq ndaej miz baez ndeu gou bae ranz doxda gaemh duzbit, yawj raen duzbit cingq comz youq, youq laj gofaex gwnzhamq ninz ndaek ne. Gou laeglemx byaij daengz gwnz- hamq, siujsim dwk depgaenh duzbit, iet fwngz riengjret bae gaemh duzbit, seizhaenx, duzbit singj lo, gyoengqde hai fwed mbin deuz lo, dauqfanj gou mbouj ndwn onj laemx lo, ndaej gwn gaemz haexbit ndeu. Gou simngeix bang bit neix caen gyauvad youh riengj, caen dwg- haenz. Gou mbouj fug, buet bae gaemh duzbit, hoeng gyoengqde mbouj dwg ndoj deuz, couhdwg buet roengz ndawdaemz bae, gou yawj gyoengqde yienghneix hangz gou, ndawsim gou gig mbouj fugheiq, ciepdwk youh bae gyaep gyoengqde haujlai nanz, seizhaenx gou rox- nyinh daraiz dangqmaz, gyaeuj ngunh ga saenz, diemheiq hojnanz, riengzdwk caekhaex baez naengh gwnznamh, gvaq haujlai nanz cij miz di rengz. Gou naemj, yienghneix guh mbouj ndaej, mboujdan gaemh mbouj ndaej duzbit, lij loengh gou ndang naiq. Gou yawjraen miz aen ranzbungz hung ndeu, sikhaek miz aen siengjfap ndeu, gou dawz diuz faexraez gwnz- namh bangx duzbit haeuj ndaw ranzbungz hung bae, gou souj youq bakdou, gyoengqde mbin hix mbin mbouj ndaej okbae, gou gig yungzheih couh gaemhdawz duzbit dahraix. Ma daengz ranz daxmeh yawjraen gwnznaj gou raiz, youh yawjraen fwngz gou riuj duzbit haenx, daengj lwgfwngmeh haenh gou naeuz:“Caen ak ha.”Gou riuhihi naeuz:“Mbouj miz maz law.”

Bouxboux cungj miz gij saehyinx lwg- nyez de, vaiqvued hix ndei, haemzhoj hix ndei, doiq de cungj dwg gij ndaejgeiq ceiqlaeg. Gienh saeh seiziq gaemh bit neix, gou itcig geiq youq ndawsim.

(Sanglinz Yen Dafungh Cin Vangzcouh Siujyoz haj nienzgaep Cuh Ciyenj boux lauxsae son’gyauq Vangz Gveiyangh)