Ah Veij hemqgwdgwd, raemxda rim naj, lumj youq gij haemzhoj ndawde cakdai. Meh de ceng mbouj geijlai gvih youq gwnznamh, dawz lwgfwngz Ah Veij cuengq youq ndawbak roengzrengz sup, gwnz najbyak hix conh ok gij hanh naed dem naed, nyaeb byoem hung he cungj gyuek youq najbyak, henzgemj mbouj rox venj hanh roxnaeuz raemxda, gou cij raen naed lienz naed doek roengzdaeuj.

Gou sim’in raixcaix, gij cingz- gingj neix lumj youq gyawz raen gvaq, gij in’get Ah Veij caeuq gij simgaenj daxmeh de, gou lumj roxnyinh ndaej cingcing cujcuj, cungj roxnyinh neix hawj gou doeksaet youh ndeilau, mbouj nyaenxsim caiq cimyawj gwnznaj raemxda rimrad mehlwg Ah Veij, baez cienq gyaeuj, raen Ah Gunh cingq nyenghnyengh ndwn youq henz- ndang gou.

“Deng duzngwz maz haeb?” Gou sing daemq cam de.

“Gou hix mbouj rox.” Ah Gunh yung mbaq baez ndeu.

“Mwngz mbouj dwg caeuq de doxyouq gip maknganx ha?” Gou ca mbouj geijlai hemq hwnjdaeuj lo.

“Gou cij ndaejnyi de ‘ai’ sing ndeu, ndwn youq laj gofaex gwq bi fwngz.”

“Mbouj ndaej raen duzngwz?”

“Ndaej raen, hoeng mwhde gou hix lau ndaej nyengh lo.”

“Duzngwz yienghlawz?”

“Ndaemndutndut, mongmwtmwt, raezrangrang……”

“Miz geijlai raez?”

Ah Gunh mbehai song fwngz baez ndeu, aiq miz song cik raez.

“Mwngz caen huk, vihmaz seizde mbouj bang Ah Veij sup lweddoeg okdaeuj ne?”

“Gou mbouj gamj.”

Gou yiemjyiemj haibak sinz vahsoemj ndaq de lo, “ndaek ced vunz mwngz, mbeiiq lai lo!”

“Gou aeu saivaq cug lwgfwngz de hwnjdaeuj.” Ah Gunh doq bouj gangj coenz he, caemhcaiq nyengq ndang coh henz, lumj lau gou yaek cuk de gaemxgienz he.

Dahraix, danghnaeuz mbouj dwg youq ndawranz Ah Veij, gou doq cuk aek de gaemxgienz he.

“Meh, ndei lo! Meh, in dai gou lo……”

Gij sing Ah Veij heuh yinx gou cienq naj bae yawj de.

Daxmeh de mbouj oksing, lumj vunzfaex nei, roengzrengz cadawz fwngz Ah Veij, cuengq youq ndawbak sup lweddoeg biq ok.

Gou caeuq Ah Gunh haj roek boux lwgnyez humx youq seiqhenz, caezgya cungj gig naekcaem, hoeng byawz hix siengj mbouj ok miz maz fap ndei bae bang Ah Veij.

Bakdou miz saek raq sing yamqdin, gou baenq gyaeuj baez yawj, dwg Ah Cang caeuq Ah Giuh cung haeujdaeuj lo.

“Hi——”(caengz sat)