Bi’gvaq seizcou haggeiz moq hainduj, ndaw hagdangz it nienzgaep miz dah hagseng naengh youq gwnz eijloek ndeu, nyoengx aen eijloek dwg boux mehmbwk ndaej samcib geij bi ndeu, yawj ndaej ok dwg daxmeh boux hagseng. Moix ngoenz banhaet, daxmeh hai denceh soengq de daengz hagdangz, yienzhaeuh umj de hwnjdaeuj, menhmenh cuengq daengz gwnz eijloek bae, gaex gvaq cauhcangz gvangqlangh, byaij haeuj ndaw gyausiz bae, youq aen daizsaw doeklaeng ndeu, youh daj eijloek umj de cuengq youq gwnz daengqeij, baij ndei gij saw de aeu yungh, aeu cag cug ndei gij ga mbouj ndaej byaij de, guh sat gijneix, cij lizhai gyausiz, youq rog ra aen gungx deq dawz. Roengzdangz le youh aeu umj de bae diengzhaex. Mboujguenj mbwn- rongh roxnaeuz mbwnraemh, mbouj- guenj seizndat seiznit, cungj dwg yienghneix.

Dah hagseng neix yawj hwnj- daeuj beij doengzban doengzhag hung sang haujlai, doeklaeng ndaej rox nienzgeij de wnggai doeg sam nienzgaep lo, hoeng aenvih ndang- daej miz bingh, mbouj miz saek aen youwzyenz nyienh sou de. Gvaq le geij bi, dauqdaej miz aen youwzyenz ndeu nyienh sou de lo, hoeng ngaenzsaw cix aeu beij bouxwnq lai haujlai. Caemhcaiq aenvih dah hagseng neix mbouj ndaej gag goq bonjfaenh, daxmeh de hix cijndaej ngoenzngoenz youq hagdangz buenx de ciuqgoq de, mbouj ndaej okbae guhhong, ndawranz souhaeuj couh baengh boh de boux vunz ndeu, gij saedceij ranz de gvaq ndaej engqgya hoj lo. Ndigah de youq ndaw youwz- yenz doeg le sam bi le, couh daj ndawsingz dauqma daengz lajmbanj doeg siujyoz lo, yienghneix ngaenz- saw mbouj bae baenzlai. Gyoengq lingjdauj caeuq lauxsae ndaw hag- dangz raen song mehlwg hojlienz, couh youq hagdangz anbaiz faenh hong ndeu hawj daxmeh de, moix ngoenz cawj haeux byaek hawj gyoengq lauxsae, yienghneix ndaej hawj ndawranz demgya di souhaeuj, youh ndaej seizseiz ciuqgoq de. Daxmeh de gyo’mbaiq lingjdauj hagdangz dangqmaz, cawj haeux byaek gig haeujsim, ciengzseiz swnh- fwngz guh gij saeh wnq dem, gaenx fwngz gaenx ga raixcaix.

Bi ndeu daeuj, dah hagseng neix couhdwg yienghneix, moix ngoenz deng cug youq gwnz gadaiz, ndangdaej byongh bomz youq gwnz daizsaw, cengqgengz cengjdaeux fwngz gyaeuj, gaem maenh ganjbit, dwgrengz youq gwnz gobwnj geiq bitgeiq、raiz cozyez. Hoeng, baenz- neix hoj guh, de vanzlij genhciz nyinhcaen hwnjdangz, mbouj lauq- gvaq. Mboujguenj cozyez miz geijlai, de cungj ciuqseiz guh liux.

Bi ndeu gvaqbae lo, de hwnj ngeih nienzgaep lo, gyausiz de hix daj caengz daih’it buen daengz caengz daihngeih lo. Ndang de maj miz di noh lo, daxmeh de cix aeu aemq de lai benz caengz laeuz ndeu. Gij ciengzmienh gamjdoengh vunz neix moix ngoenz dou cungj ndaej yawjraen, gig gamjdoengh, baenzlawz nanz baenzlawz hoj hix aeu soengq dahlwg hwnjdangz, mboujguenj de hag ndaej geijlai、rox geijlai doxgaiq, mboujguenj doeklaeng de ndaej mbouj ndaej baengh gij doxgaiq de hag ra ndaej faenh hong ciengx bak. Dah hagseng neix caen hojlienz, ndangcanz mbouj ndaej lumj lwgnyez wnq yienghde buet bae buet dauq diuq hwnj diuq roengz guhcaemz, hoeng, de caen vuenyungz, miz bohmeh baenzneix gyaez de, caenh gij rengz bonjfaenh soengq de bae hagdangz doegsaw, mbouj bwed mbouj vut de gvaq. Gyoengqde lumj go’nywj geh ndawrin nei, roengz- rengz bae did nyaz、 bae majhung, youq benq rin fwzyauyau yienh ok gij heu bonjfaenh.

Mizseiz gag ngeix, lauheiq lauxsae hawj dou raiz haujlai saw seiz simnyap, lauheiq dijyuz lauxsae heuh dou youq cauhcangz buet dou cix cungj naeuz buet mbouj ndaej, lauheiq seizndat dou mbouj nyienh bae hagdangz…… Gijneix doiq dou daeuj gangj, cungj dwg saeh iq saeh bingzciengz, hoeng doiq dah hagseng neix daeuj gangj, gij saeh neix ciuh vunz de cungj hoj guh roxnaeuz guh mbouj ndaej gvaq, danghnaeuz gig vei guh saek gienh saeh de cungj roxnyinh vuenyungz lo. Hoeng de moix ngoenz souh baenzlai nyoeg- nyamx caeuq haemzhoj hix riu gvaq ndwenngoenz, caenhrengz lix roengzbae, caen hawj vunz boiqfug!

Daih lai vunz gvaq ngoenz suenq ngoenz, sai ngaenz sai rengz bae guhcaemz, maz cungj mbouj guh, maz cungj mbouj hag, caen dwg begbeg uengjfeiq seizgan. Caen aeu lumj song mehlwg yienghde, najdoiq gumzgamx mbouj nyinhsaw, roengz- rengz cengjdaeux. Caemhcaiq moix ngoenz cungj baenzneix gyaeundei, maqmuengh caezgya cungj insik, mbouj simnyap mbouj simfanz, nyinhcaen gvaq, angqyangz gvaq!