Daihcibgouj Doengzdoih Deng Duzngwz Haeb Lo

Ah Giuh byaengq song lwgda lumj duhnamh nei naeuz:“Ai, mwngz lij caengz rox ha? Ah Veij deng duzngwz haeb lo!”

“Maz? Seizlawz?” Baezneix daengz gou deng songde hwk baez he lo.

“Haxbaenh, de caeuq Ah Gunh doxciengj gip maknganx seiz, youq ndaw caznywj baihnaj diuz mieng deng duz ngwzdoeg he……”

“Ngwzdoeg? Ngwzdoeg maz?”

“Gou hix mbouj rox, cungj dwg Ah Gunh lwnh hawj gou.”

“Haeb deng ga lo.”

“Mbouj, dingqgangj dwg haeb deng fwngz.”

“Seizneix ne?”

“Ah Gunh gyoengqde buenx de maranz lo, mwngz daj ndaw mbanj daeuj, mbouj raen gyoengqde?”

Gou doq cienq ndang, riengjret buet coh ndaw mbanj bae.

“Ah Byauh, deq dou ndij!”

Song lwgnyez haenx youq baih- laeng hemq, gou gyaeuj hix mbouj baenq doxdauq buet.

Gou doq buet doq naemj gij goj haemhlwenz Aulungzgveiz lwnh hawj gou, ga Lungz Byauh deng ngwzdoeg haeb gaemz ndeu, danghnaeuz mbouj dwg Siu Cuh doq bang de sup lweddoeg okdaeuj, couh dai lo! Ah Gunh dangseiz bang Ah Veij sup lweddoeg okdaeuj caengz? Duzngwz haeb Ah Veij haenx dwg duz maz? Ngwzgimngaenz? Ngwzcaet- yamq? Roxnaeuz dwg ngwzheu? Cuet lai lo! Ah Veij dwg lwgdog, daxmeh de bingzciengz gyaez de lumj aen dijbauj nei, saeklaeuq ok maz saeh, daxmeh de itdingh daej yaek dai yaek lix bae!

Gou doq naemj doq buet, doq buet doq naemj.

Gou mbouj mbwq Ah Veij lo, dauqfanj gig yousim caemhcaiq doengzcingz de.

Bouxvunz gou couhdwg yiengh- neix, gig yungzheih bae mbwq doenghgij vunz gou roxnyinh coegda, engq yungzheih bae doengzcingz doenghgij vunz deng cai deng nanh.

Lwgdinmeh gou hix mbouj rox daemjndoet le geijlai mbat ragfaex, in baenz gou cijndei aeu cik din he diuq, gou vanzlij mbouj daengx roengzdaeuj, itcig buet coh ranz Ah Veij ndaw mbanj.

Yat haeuj gij giemxdou sang ranz de, yawjraen Ah Gunh geij lwgnyez cingq humx youq baihnaj ndaw ding.

Gou caenx haeuj ndaw bae, yawjraen Ah Veij daejswdswd naengh youq aen daengq, daxmeh de maeuq youq dangqnaj de, cadawz fwngz de, cuengq haeuj ndaw bak bae sup, henzndang gwnznamh aeu cien bu gaenq biq le dan myaiz miz seilwed lo.

“Baenzlawz yiengh lo?”

Gou fouz gyaeuj fouz rieng cam coenz ndeu, gyoengq lwgnyez cungj cienq naj daeuj yawj gou, hoeng byawz hix mbouj hai bak han gou.

Gou miz di najhawq, ning le baez he, muengh coh Simjmehveij.

(caengz sat)