Cungguek sinsizva,

Gwnzvangj caz doq daengz,

Youq gyae yaek doxdaengq,

Daengh veihsin couh ndaej.

Yaek siengj cawx buhvaq,

Gwnzvangj caj cawx ndaej,

Hix mbouj yungh okbae,

Huq gag ndaej daengz ranz.

Aen soujgih geizheih,

Cozyung ceiq dwg hung,

Dawz aen de ma yungh,

Mbaet rengz youh fuengbienh.

Seizdaih moq doiq fwen,

Ndwi dwen comz guhdoih,

Baengh sibinz doxdoiq,

Lainoix cib fanh vunz.

Hwnj haw cawx doenghyiengh,

Ciengx lij yungh daiq gaj,

Seizneix sauj aen maj,

Ngaenz daj neix daengz de.

Yaek bae haw bae mbanj,

Mbouj hoj fanz daiq ngaenz,

Daiq soujgih couh baenz,

Mbouj lau ngaenz deng lab.

Ok gyae yaek cawx biuq,

Soujgih ciuq couh ndaej,

Guenj mwngz daengz gyawz bae,

Itdingh caez daemx dieg.

Seizdaih moq gyauhdungh,

Doeng dieg giz lajmbwn,

Daengz laj rox daengz gwnz,

Doek fwn cungj mbouj nguh.

Gauhdez caen vaiqdi,

Fouz loek hix riengj roux,

Namzningz daengz Gvangjcouh,

Naengh saek yaep couh daengz.

Ciiq vunzlai meiz(miz),

Roen ndei hai ndaej bieng,

Bungz gvaq ciet gvaq cieng,

Yaepda riengz daengz ranz.

Caih giz gyawj giz gyae,

Vunz okrog bae youz,

Miz gwn youh miz youq,

Bouxboux cungj simhai.

Bouxlawz miz bonjsaeh,

Ndaw daeh ngaenz couh lai,

Bouxboux doengz fatcaiz,

Mbouj miz lai couh noix.

Youq rog dang laujbanj,

Haicieng couh canh ngaenz,

Mbouj dwg gangj guhcaemz,

Ngoenz sou ngaenz ndaej dad.

Gizgiz miz gihvei,

Boux beij boux guh ndei,

Gwn daenj maz cungj meiz(miz),

Bei(bi) doek bei(bi) hoenghwd.

Yamq haeuj seizdaih moq,

Seiz gwn hoj gaenq gvaq,

Roen ndei youq baihnaj,

Mbouj deq caj bouxgik.

Fwen danq seizdaih moq,

Goj hix gangj mbouj liux,

Aeu Cunghgoz daeuj ciuq,

Gangj baenzciuh mbouj caez.

Seiqgyaiq gij bienqvaq,

Lwgda raeuz ndomq raen,

Mbouj dwg gangj guhcaemz,

Raeuz da caen ndaej yawj.

Ronghndwen dingq le, roxnyinh gyoengq lwgnyez dwg eu saeh caen, naj mongmatmat, mbouj gamj caiq yauj saek coenz, gaenjgip caeu naj haeuj ndaw fwjna bae, haujlai nanz cungj mbouj gamj hai faj naj de okdaeuj……

（2 sat）