Gou riengz gofaexnganx henzdah gwq byaij gwq byaij, cij youq ndaw- mieng mbouj yienhda roxnaeuz ndaw caznywj gip ndaej geij naed mak- nganx, mingzyienj moengj maknganx cungj deng bouxwnq gip bae lo, haemhlwenz haengjdingh miz haujlai maknganx deng fwnhung soen roengz- daeuj.

Gou gig ienqhaemz caeuq nyap- nyuk, haemz bonjfaenh ninz ndaek lai, hwnq nguh lai, cix engq haemz doenghgij vunz beij gou hwnq romh, gip maknganx doek gonq bae.

Gou doq byaij doq daen, geij naed maknganx gip ndaej youq ndawbied ringx bae ringx dauq, caen doeknaiq!

Sawqmwh, baihnaj cienz daeuj geij sing bouxvunz gangj vah, gou ngaem gyaeuj gungj hwet, bongh coh baihnaj, yenzlaiz dwg Ah Giuh caeuq Ah Cang, songde dangjnaj byaij gvaqdaeuj.

“Hai!” Gou swenj sing ndeu, songde beij gou nuengx saek bi song bi, cungj deng gou haep lo.

“Ai, Ah Byauh, mwngz yaek hawj dou daihaep?” Ah Cang hemq.

“Yenzlaiz dwg sou ciengj mak- nganx gou lo, gou laihnaeuz dwg byawz dem!” Gou byaij gvaqbae cazyawj aen bied songde, cungj gip ndaej yaek miz byongh aenbied yienghneix. Gou gig geizheih, song ndaek vunz fangz neix, baenzlawz hix cij gip ndaej di neix ndwi?

“Mbouj dwg dou ne!” Ah Giuh sup gaemz mug ndeu, bibi aen bied de, gig utheiq naeuz, “dou hix hwnq nguh lo!”

“Ha, gou laihnaeuz deng sou gip bae caez lo.” Gou nyiuz songde le, gij vah hix gangj ndaej unqswnh lo.

“Ah Veij gyoengqde ceiq caeux, gip ndaej haujlai!” Ah Giuh youh bouj gangj coenz ndeu, de hix hozndat boux daeuj gip gonq.

“Mwngz yawjraen lo? Caen dwg Ah Veij!” Gou haeb heuj haeb faenz, Ah Veij ndaek vunz neix mboengqneix ciengzseiz caeuq gou doxdingj, haet- neix youh hwnq ndaej beij gou lij romh, gip gij maknganx laj gofaex- nganx liux bae, gizgiz cungj beij gou ak, danghnaeuz mbouj ra gihvei hawj de cimz saekdi haemzhoj, doeklaeng gou youq gyoengq lwgnyez ndawmbanj couh mbouj miz maz diegvih lo.

“De hwnq ndaej romh, gip ndaej lai, hoeng hix boihseiz lo!” Ah Cang nyengqgyaeuj, mbouj haeujsim gangj.

“Miz maz boihseiz? Gip rim bied maknganx he baema, daxmeh de baenzneix sim’angq—— ‘Lwg ndei- gyaez lai, caen dwg noh simdaeuz daxmeh ha’. Bei!” Gou gig gaeh, byawz beij gou ak, gou couh mbouj cwxcaih.

(caengz sat)