Bineix sam nyied mbouj eu fwen,

Cungqvunz baez dwen couh simcieg;

Dunghhangz feihgih doek roengz dieg,

Bak lai vunz biek mbouj raennaj.

Feihgih deng nanh caen sim’in,

Yaepyet doek din roengz ndoengfaex;

Cien heuh fanh heuh hix mbouj ndaej,

Beixnuengx sing daej haeuj bae yaem.

Mbouj raen goetndok mbouj raen ndang,

Danhnyienh diendangz mbouj miz haih;

Gwnzbiengz cungqvunz daej sing daih,

Seiqfueng betbaih raemxda lae.

Sam nyied rumz raeuj ci gwnzbiengz,

Hojsik sim liengz mbouj gyaez hauq(gangj);

Guekcoj ngoenzneix miz saeh laux(hung),

Lwgsau lwgmbauq mbouj doiq fwen.

Yienznaeuz mbouj siengj oksing ciengq,

Gou hix caenhliengh damz geij coenz;

Aeu fwen daeuj nai gij minghhoen,

Moqnaj byaij roen lai miz rengz.

Gou gangj lizsij Sam Nyied Sam,

Hawj gyoengq doengzban doengzcaez rox;

Bouxboux yaek niemh coq ndaw hoz,

Bouxlaux bouxcoz doengzcaez geiq.

Yaepda youh daengz Sam Nyied Sam,

Cien gya fanh ranz guh haeuxnaengj;

Daek hwnj gwnzdaiz dawz daeuj daengj,

Haeuxnaengj hajsaek gingq saenzsien.

Sam nyied cosam mbouj eu fwen,

Duzrwi ndawsuen hix geizheih;

Mbouj raen sau mbauq daeuj ciengq beij(fwen),

Gwnzbiengz dauqdaej miz saeh maz.

Sam nyied vadauz riux rumzcin,

Raen vunz naj nding mbouj gangjvah;

Sau mbauq mbouj guh fwen doxdax,

Mbanjgwnz mbanjlaj caemrwgrwg.

Doenghbaez ngoenzneix ceiq nauhyied,

Gizgiz vunz ndwet(nauh) lumj dahhaij;

Ciengq go diuq foux bouxboux maij,

Fwen lumj raemxhaij bongh fubfab.

Haeuxnaengj gyaeqhoengz rap gvaq mbanj,

Beixnuengx doengz ganj haw guh fwen;

Sing fwen yiengjgok doh seiqfueng,

Youq laj faexvueng menh danzgimz.

Haeuxnaengj cix boiq go’gyaemqhoengz,

Gova fuzyungz boiq mauxdan,

Sau mbauq doxraen Sam Nyied Sam,

Bouxboux sim van lumj gwn dangz.

Sam nyied cosam bae ganj haw,

Duzrwi hix dawz va daeuj laeq(yawj);

Bak eu beij fwen cienz cingzeiq,

Coenzcoenz cungj beij dangzrwi diemz.

Go hix gvai le nuengx hix gvai,

Song boux hwnj daiz fwngz gaem fwngz;

Bineix sam nyied raeuz doxbungz,

Bimoq faex hung youh hai va.

Faex sang fanh ciengh mbouj liz rag,

Saegve gietmak mbouj liz gaeu;

Cietfwen Bouxcuengh dwg bauj raeuz,

Cungqvunz dingh aeu lai cienzswnj.

Guengjsae soqlaiz dwg fwenhaij,

Vunz miz dungxcaiz gig coengmingz;

Beijfwen couh lumj raemxdah cin,

Bongh gvaq gwnz rin bae fanh leix.

Lajmbwn ceiq gyaeu dwg Guengjsae,

Duzroeg maij raez(heuh) vunz maij ciengq;

Samcej caux fwen louz gwnzbiengz,

Cungqvunz doxriengz ciengq fanhdaih.

Gonq Sam Nyied Sam godaiz baij;

Vunz lai lumj haij sim angqyangz;

Angq ciengq Cungguek Gungcanjdangj,

Bang raeuz gyaq hwnj giuzvuenyungz.

Cien bya hai va fanh dieg rang,

Ciengq Gungcanjdangj aencingz hung;

Caux hawj bouxminz ndaej vuenyungz,

Haenq guh duet gungz bongh siujgangh.

Go daeuj buenx nuengx nuengx buenx go,

Guhlumj roq gyong buenx ndaek laz;

Ndwenngoenz vuenyungz vunz siusaj,

Doengz gvaq siujgangh swnghhoz ndei.

Sam nyied ganj haw caez hwnjdin,

Buguz(roeg) hai sing yiengj seiq baih;

Riengz Gungcanjdangj doengzcaez byaij,

Cien bi fanh daih mbouj dauqlaeng.

Mbwn raeuj ndit angj ciuq gwnzbo,

Va hoengz gogo lengj youh rongh;

Gwn raemx ngeix goek mbouj lumz bonj,

Geiq maenh geiq onj aen dangj raeuz.

Gwnzbya vareux bibi hai,

Mbanjcuengh godaiz bibi yiengj;

Sam nyied cosam bibi ciengq,

Fwen rim gwnzbiengz cingz rim aek.

Sam nyied mbwn raeuj saedcaih ndei,

Sing fwen mbin bae buenx mbungqmbaj;

Sau mbauq eu fwen daeuj raennaj,

Baenq gwnz baenq laj mbouj dauqranz.

Bineix biguk Sam Nyied Sam,

Biengz miz cainanh mbouj angqyangz;

Hoeng raeuz baengh miz Gungcanjdangj,

Ndaej dingj cainanh mbouj lau maz.

Diuz Dahraemxhoengz lae fanh leix,

Bouxcuengh ciengq beij cien bi raez;

Bineix sam nyied sim mbouj hae(hai),

Bimoq menh naez(ciengq) guh nauhyied.