Gou baegfofo daj ndaw lijdangz buet okdaeuj. Hw! Heuh dou daeuj baizlienh, gijmaz hix mbouj hawj dou guh youh heuh dou dauqbae……Hw! Laihnaeuz gou dwg “heuh daeuj couh daeuj, heuh dauq couh dauq” lwi？

Gaenq banringz cuengqhag lo, gou lij dauqbae gyausiz aeu soujbiuj caiq bae vujdozbanh.

Byaij daengz laeuzngeih, gou sawqmwh yawjraen miz gyoengq vunz ndeu cingq roengz laeuz, baengzyoux ndei gou Linz Sinhyez hix youq ndawde, gou yaek hemq de caj gou caez bae, cix yawjraen Moz Vwnz- gyah byaij gvaqbae dap mbaq de, song boux byaij lo. Sawqmwh, gou hozhwnj dangqmaz：Hw! Gou mbouj youq couh caeuq bouxwnq doxndei, caen gvaqbouh! Gou yienznaeuz rox bonjfaenh simcingz mbouj ndei, hoeng couhdwg hozroengz mbouj ndaej. Gou nyinhnaeuz cingzngeih vut gou lo.

Gou boux dog bae vujdozbanh.

Lingx haeux le, gou sawqmwh vuenheij hwnjdaeuj:“Va, ndaw haeux miz funghcangz gou gyaez gwn!” Gou vuenheij gwn dwk.

“Yauz Senhyingz, mwngz youq gizneix ha!” Gou dingqnyi sing neix, najbyak nyaeuq hwnjdaeuj lo, naemj：Vihmaz mwngz youq mwh gou vuen- heij daeuj gizneix, hawj simcingz ndei gou mbouj miz lo?

Linz Sinhyez menhmenh byaij gvaqdaeuj, naengh youq baihnaj gou. Gou mbouj leix de, laebdaeb gaemz hung gwn haeux. Seizneix, de aeu gonj bit yiengh lumj duj va ndeu okdaeuj:“Ne, Yauz Senhyingz, mwngz banringzgvaq hwnjdaiz biujyienj mbouj dwg yaek dawz va’gyaj lwi? Gou rox mwngz mbouj daiq, yiengh- neix caeuq Moz Vwnzgyah doxcaez bang mwngz cawx gaiq neix.” Gij- maz？ De mbouj vut gou! “Gou……Gou……” Gou sawqmwh najmong dangqmaz. Seizneix, baengzyoux ndei Dangz Sihgiz daeuj lo, Moz Vwnz- gyah hix daeuj lo, gou sawqmwh nyinhnaeuz ndawsim raeujrubrub, gou ledged lai lo.

Cingzngeih mbouj vut gou.

(Bwzswz Si Yougyangh Gih Yizfuh Siujyoz Yauz Senhyingz)