Cien ranz fanh ranz, couh miz cien loh fanh loh gvaq haemhndaep.

“Gvaqcieng lo, gvaqcieng lo!”“Gvaqcieng ndei.” Gyoengq lwg- nyez diuqyetyet, vuenheij dangq- maz. Gyoengq vunzhung dox baiq- cieng ndeiraeuh. “Lwgnyez muengh gvaqcieng, vunzhung lau gvaq- cieng”. Gvaqcieng dwg mwh lwg- nyez dou ceiq vuenheij, gvaqcieng dwg mwh gyoengq vunzhung ceiq simnyap. Dou vuenheij dwg aenvih ndaej cienzlok, vunzhung simnyap dwg aenvih……Mbuk daehcienz. “Hehe, cienzlok, cienzlok.” Nuengx- biuj riu caeuq daxboh naeuz：“Gvaqcieng ndei, goengheij fatcaiz, cienzlok aeu daeuj!” Riengz laeng iet fwngz okdaeuj, gaenjgip dangq- maz. Daxboh vuenheij mbuk bak maenz cienz okdaeuj hawj nuengx- biuj; nuengxbiuj diuq hwnjdaeuj, angqyangz caeuq daxboh naeuz:“Gyo’mbaiq bohnax!” “Mbouj yungh!” Daxboh caeuq de riuriu naeuz. “Ha! Miz cienz lo, miz cienz lo!” Naemj mbouj daengz, mehheiz iet fwngz okdaeuj naeuz:“Aeu daeuj, daxmeh bang mwngz guenj.” Nuengxbiuj fouznaih aeu bak maenz cienz hawj daxheiz, bonjfaenh hoz- hwnj dwk naengh youq gwnz sah- faz. Cienz vunzhung hawj lwgnyez, daengzlaeng lijdwg vunzhung guenj. Ai! Gou haeujhoz nuengxbiuj dangqmaz ha! Mboujgvaq, binaengz cienzlok gou dwg hawj daxmeh bang gou yo haeuj ngaenzhangz bae, caj gou majhung lo, wnggai miz haujlai ba!

“Daeuj, dwkbej!”Bohheizsam gaem bej naengh gwnz eij naeuz. Daxgoeng dwg ndaw ranz bouxvunz ceiq fanjdui dwkbej, bek congz hozhwnj naeuz:“Dwk maz bej, gyoengqsou mbouj dingq gvaq lwi？Doj iq sieng cingz, doj hung sieng ndang!” Bohheizsam cijndei cuengq bej roengzdaeuj. Seizneix, ndwencieng lienzvuen vanjvei ndei- yawj hainduj lo, dou daengx ranz vuenvuen heijheij naengh yawj, ndaw densi cezmuz ndeiyawj dangq- maz, ndaw ranz gizgiz miz feih gvaqcieng hoenghhwd.

Vanjvei sat le, dou daengx ranz youh roengz laeuz bae cawx bauq- rengh bauqva, hainduj aen cezmuz ceiq ndei loengh! Daeggo cawx bauqvut, gou cawx bauqvaganj, daxboh cawx ndaundeiq muenx mbwn……Youq gwnz gai, va! Nauhyied dangqmaz ha! Miz haujlai vunz cuengq bauqva ne, gyangmbwn miz bauqva gyaeundei gak cungj gak yiengh, dou angqyangz dangqmaz. Gou caeuq daeggo doxyaeng daeg- daengq bae hwk bouxwnq, dou vut bauqvut roengz gwnz dieg bae, bouxwnq caij deng couh deng hwk. “Go, gou guh lo!” Gou laeglemx caeuq daeggo naeuz. “Hainduj guh!” Daeggo hoizdap gou naeuz, gou swnh nuengxbiuj mbouj haeujsim vut bauqvut roengz gwnz dieg bae, nuengxbiuj mbouj siujsim caij deng,“bung!” Nuengxbiuj deng hwk daej lo. Couh yienghneix, haemhndaep dou couh dingq sing daej nuengxbiuj gietsat bae……

Neix couhdwg haemhndaep ranz gou, ndaw bingzciengz miz vuenheij, ndaw vuenheij hix miz simnyap, caen dwg gijmaz cungj miz.

(Liuz Siujvaz)