Miz raq fwn roq gij vax dingjranz, yiengjgungung, gou cij ndaej dauq- cungz naengh roengzdaeuj, byaengq da yawjyawj ndaw ranz, gaenq laep- saengsaeng dahraix, haxbaenh dan haeujsim nyi Aulungzgveiz gangjgoj, gingqyienz lumz gaenq gvaq ndaej geijlai nanz, hix lumz bek duznyungz, seizneix cij roxnyinh gaenq mbouj caeux lo, hix cij roxnyinh song laengdin humz yaek dai, hix mbouj rox miz geijlai duz nyungz haeb gou.

Gawqyienz baihrog doek fwn- hung, gou simgaenj hix mbouj miz yungh lo. Gou doq gaeu humz doq cam Aulungzgveiz:“Aulungzgveiz, doek- laeng Lungz Byauh dwg mbouj dwg ndaej cuengq okdaeuj lo?”

“W, sam bi gvaqlaeng. Ah Gwnh ndaej deuz dauq lo, de cwngqmingz Lungz Byauh mbouj dwg lajfwngz ‘Vangzvaizgvaiq’ bang caeggeq haenx, baenzneix Lungz Byauh cij ndaej cuengq okdaeuj.”

“Caen dwg seizheiq ndei.” Gou vih Lungz Byauh sim’angq.

“Seizheiq ndei? Hei!” Gij sing Aulungzgveiz youq ndaw laep saenq, “Lungz Byauh yienznaeuz ndaej cuengq doxdauq, hoeng ranz de gaenq mbouj miz lo.”

“O, gou rox lo! Aulungzgveiz, Lungz Byauh couhdwg mwngz! Deng mbouj deng?”

“W, hix goj ndaej yienghneix gangj.”

“Baenzneix Siu Cuh dwg byawz ne?”

“Neix, neix……couh hoj gangj lo.”

“Cinz Dayenz ne? Mbanj raeuz mbouj miz Cinz Dayenz ha!”

“Couhcinj miz, hix gaenq dai lo, gij saeh dwg cibgeij bi gaxgonq lo!”

“Caiq gangj, Ah Gwnh dwg mbouj dwg daxboh gou?”

“Baenzlawz laihnaeuz Ah Gwnh dwg daxboh mwngz ne?”

“Daxboh gou dwg daegseiq ha! Bouxwnq cungj heuh daxboh gou guh Auseiq.”

“Ha, caen dingjlingz.”

“Daxboh gou hix gig mbeiiq bw. Daxmeh gou gangj, daxboh gou gyahaeuj le binggwzming, bae daengz baihbaek lo. Gou gaenq haujlai bi mbouj ndaej raen daxboh gou lo.”

“O?”

“Gaxgonq daxmeh gou baez hozhwnj, daxboh gou couh foengx lo, danghnaeuz mbouj dwg daiq gou bang de, couh cuet lo!”

(caengz sat)