Miz vah naeuz “ma mbouj yiemz ranz hoj, lwg mbouj yiemz boh rwix”. Gou sengmaj youq lajmbanj, gwn- daenj caeuq vunz baihrog mbouj doxdoengz, gangjvah hix caeuq vunz baihrog mbouj doxdoengz.

Hoeng, gou mbouj yiemz ranz- mbanj gou, engq mbouj yiemz gij vahmeh ranzmbanj gou.

1995 nienz 9 nyied, gou yamq haeuj aen doulaux Gvangjsih Saw- cuengh Yozyau, aenvih Vahbujdungh gangj mbouj byauhcunj, mbouj gamj caeuq gyoengq doengzhag itheij gangjgoj, gou itcig maqmuengh ngoenz couhmoz daeuj daengz.

Couhmoz gou couh bae ra gyoengq vunzmbanj gou, dou comz youq itheij gangj vahdoj, gangjgangj riuriu, gvaqyinx raixcaix, cijmiz couh- moz, gou cij gvaq ndaej ceiq sim- angq、ceiq cwxcaih.

Miz baez ndeu, gou dungx in, riengz banhcangj cingjgyaj, gou naeuz:“Banhcangj, gou ‘du swj dung’.” Banhcangj dingq le aiq dwg dingq mbouj rox maz eiqsei, ngeizvaeg yaep he cij naeuz:“Mwngz gangj maz?”

Siuj Cinz doengzhag dingq le, daih riu hwnjdaeuj, de sing iq naeuz:“Dwg mbouj dwg ndaw dungx mwngz miz lwgnding? Vihmaz ndaw dungx doengh?”

“Mbouj deng ba, ngamq daeuj doegsaw……” “Danghnaeuz dwg lwgnding, aen dungx wnggai hung hwnjdaeuj ha……” Gyoengq doengz- hag cungj ngeixlwnh gou.

Gij vah gyoengq doengzhag cungj heuxgeuj youq henz rwz gou, seiz- haenx gou caen siengj ra aen dieg ndeu ndoj hwnjdaeuj. Doeklaeng banhcangj cungj daeuj lumh dungx gou, caemhcaiq lij gvansim cam gou:“Dahyiz, ndaw dungx mwngz mbouj miz maz doxgaiq doengh ha?”

Dingq daengz neix gou cij rox Vahbujdungh gou gangj mbouj cinj, dawz “tong” doeg baenz “dong” lo, loengh baenz vahriu lo.

Song cih saw neix dwg singmeh mbouj doxdoengz, gij eiqsei gangj le hix mbouj doxdoengz.

Gienh saeh neix gvaq le, gou gag naemj, gou dwg vunz Mbanjcuengh, dwg lwg Bouxcuengh, gangj Vahbuj- dungh mbouj cinj, miz maz geizgvaiq, miz maz saetlaex, seizneix gou mbouj dwg gaenq daeuj daengz hagdangz Sawcuengh loma, gou couh aeu ndeindei hag Sawcuengh, yienghneix cij doiq ndaej hwnj cojcoeng, doiq ndaej hwnj swhgeij.

Hag Sawcuengh gou dwg caen dawz haeuj dungx haeuj saej bae, gyoengq doengzhag gangjgoj guh- caemz, gou bouxdog youq laj gofaex ndaw hagdangz boih singmeh yinh- meh, gyoengq doengzhag bae haw youz, gou boux ndeu youq ndaw gyausiz lienh raiz Sawcuengh.

Gou dwg boux vunz yienghyiengh cungj naemj ceng’aeu guh ndei ndeu.

Gou Vahbujdungh mbouj byauh- cunj, lij gig gyaez daihsing doegsaw, mizseiz nyex ndaej daengx ban doengzhag cungj riu gou.

Hag ndei Sawcuengh le, gou youh roengz gietsim itdingh aeu hag ndei Vahbujdungh.

Hawj dou hwnj《Giekdaej Yij- vwnz》 dwg dahsau gyaeundei ndeu, singq Veiz, dou heuh de Veiz lauxsae, Veiz lauxsae mbouj mbwq son gou lienh doeg Vahbujdungh, rox daengz sing gou fat mbouj daengzvih seiz, roengzdangz le, de couh ciengzseiz louz gou roengzdaeuj lai lienh.

Gou moix ngoenz cungj lienh bae lienh dauq, daegbied dwg gij sing- yaem gut linx roxnaeuz mbouj gut linx, soengqheiq caeuq mbouj soengqheiq, bungzdaengz cih saw lawz doeg mbouj cinj, gou cungj fanhai baengzyoux ceiq caenmaed gou —— 《Sinhvaz Swdenj》.

Vahsug naeuz “goengfou mbouj yiemq boux miz sim. Bizyez bide, gou camgya le Vahbujdungh daengjgaep cwzsi, liuh mbouj daengz gau ndaej 87.5 faen, yienznaeuz gij cingzcik neix mbouj suenq gig sang, hoeng doiq gou daeuj gangj, neix dwg ginggvaq haujlai roengzrengz cij ndaej. Neix hawj gou vuenheij dangqmaz.

Laihnaeuz hag Sawcuengh le couh hag mbouj ndei Vahbujdongh, roxnaeuz hag ndei Vahbujdungh le couh lumz Sawcuengh, seizneix gij gaujsi suijbingz Sawcuengh, gou hix gauj gvaq le. Gou hix suenq dwg boux lauxsae Sawcuengh、 Sawgun song cungj gvaqgvan ndeu lo.

Yawj gij fajnaj gyoengq lwgnyez ndeigyaez, gou rox diuz rap gwnz mbaq gou naekgywggywg. Gou mbouj- dan aeu hag ndei Vahbujdungh、hag ndei Sawcuengh, vanzlij aeu son ndei gyoengq lwgnyez dem.

Dwg a, haujlai lwgnyez caeuq gou lij iq seiz doxdoengz, lij mbouj rox baenzlawz gangj Vahbujdungh, rox- naeuz lij mbouj ndaej gangj ndei gij Vahbujdungh, hix mbouj rox Saw- cuengh doiq lwg Bouxcuengh miz maz youqgaenj, gou dwg boux laux- sae gyoengqde, wnggai rap hwnj faenh cwzyin son’gyauq neix, hawj gyoengqde hag ndei Vahgun Vahcuengh song cungj vah, engq miz saenqsim cohbaih naj byaij bae.