“Gou gangj, gou gangj……” Gij sing bouxfamhlaux iqnyieg lumj duznyungz nei, gig dwgrengz naeuz:“Lungz Sinhmou de……de……de……”

“De baenzlawz yiengh lo?”

Lungz Byauh roengzrengz ngauz gyaeuj bouxfamhlaux, simgaenj cam.

“De …… de dai …… dai- bingh——”

“Daibingh youq gwnzbya? Deng mbouj deng?”

“……”

“De haem youq gyawz ne? Vei! Vei!”

“……”

Aen gyaeuj bouxfamhlaux lumj ngauq mbamienh raenx ceizraemxrouh nei, unqnamnam, de caiq hix mbouj oksing lo.

Gwnz dingjranz byajraez sing hung ndeu, ciepdwk youh doek fwnraq.

Lungz Byauh cuengq gyaeuj bouxfamhlaux roengzdaeuj, baez ngiengx gyaeuj, lumj miz geij naed fwn roh roengzdaeuj doek youq gwnzgemj de nei.

Ndawsim de luenhnyagnyag, mbouj rox dwg haemzhaenq roxnaeuz simcieg, de gaenq geiq mbouj cingcuj gij yiengh daxboh de lo, seizneix ndaw uk cij miz gij yiengh bouxfamhlaux neix, byomroz, doeknyieg……

Daihcibcaet Aulungzgveiz couhdwg Lungz Byauh lwi

Aulungzgveiz cingq menhmenh gangj, gangj daengz giz gikdoengh lij seiz mbouj seiz vad song fwngz hwnjdaeuj.

Sawqmwh, diuz byajyap lwenqda daj gij geh laj dou myanz haeujdaeuj, ciepdwk yiengj sing byajraez coegrwz he, gou bonjlaiz couh dwglau lo, seizneix engq deng hwk ndaej yaek hemq hwnjdaeuj, yaek aeu song fwngz bae goemq rwz hix ganj mbouj gib lo.

“Gaej lau!” Aulungzgveiz byaij gvaqdaeuj lumjlumh gyaeuj gou.

“Cuet!” Gou ndwn hwnjdaeuj, riuj aenlamz, “doek fwnhung lo, gou aeu vaiqdi maranz lo!”

“Mbouj baenz.” Aulungzgveiz fwt rag dawz gou, “caj raq fwn neix daengx le caiq bae ba.”

“Yienghneix mbouj aeu caj daengz laep?”

“Mbwn caeux couh laep lo, gou yaep he soengq mwngz maranz ba, gaej simgaenj.”(caengz sat)