Mwh lij iq, hagdangz ngamq cuengq hanzgyaj, lwgnyez couh maqmuengh gvaq cieng lo. Aenvih gvaq cieng ndaej daenj buh moq haiz moq, ndaej gwn gijhom gijmeih, ndaej cimz gak cungj haeuxceiz haeuxfaengx, ndaej cit haujlai bauqciengj, miz gwn youh ndaej caemz, vuenheij fouzbeij.

Daengz lab ngeihcib gvaqlaeng, ndaw- mbanj couh hainduj bwh gvaq cieng lo. Ranzranz bae haw aeu nienzhuq, yienznaeuz mbouj miz geijlai ngaenz, lumjbaenz diengz、bingj caeuq cehgve daengj cungj miz saekdi, cawx doiq moq he dauqdaeuj diep, vuenh doiq gaeuq bae. Gyoengq bouxcoz youq baihrog dajgoeng, laeblaeb daebdaeb ganj dauq ranz caeuq bohmeh gvaq cieng. Daengz lab ngeihsam soengq cauqvuengz, ranzranz sauq ranzsaeuq, mad dou naj dou laeng, cung swiq yangzgou, swiq duixduix batbat, angqangq yangzyangz deq gvaq cieng.

Lajmbanj itbuen youq lab ngeihcaet couh gaj moucieng lo. Ngoenzhaenx, ranzranz haet- romh feiz oenq ngauqngauq, ndat raemx gaj moucieng. Lwgnyez dawz bauqrengh bae nanz mbouj nanz cuengq aen ndeu, gij riu hoplangh youq ndawmbanj. Mbouj geijlai nanz, ndaw- mbanj sing gaj mou heuh hwnj, gvaqlaeng gyoengq bouxsai couh dangq mou、hai saej、ronq noh caeuq cauj byaek…… Bouxboux nyaengq- foedfoed lumj aen gyangq nei baenqlulu. Mehranz caeuq lwgnyez couh youq bakdou ranz bonjfaenh nem doiq moq, baez yaepda, ranzranz bakdou cungj ndingfwgfwg lo.

Daengz ngoenzndaep, gyanghaet gaj bit gaj gaeq, gyangngoenz hainduj guh byaek caeuz, miz gaeq bwzcanj、bit bwzcanj、nohgaeuq、noh oet daeuhfouhyouz caeuq bya cien, nohndoksej soemjvan, miz caet bet aen byaek. Haeux byaek guh ndei lo, youq bakdou ranz cuengq fung bauqrengh le, daengx ranz vunz couh caez naengh youq aen daiz gwn caeuz haemhndaep lo, doq gwn doq gangj vah hohfuk, bouxlaux hoh lwgnyez bimoq maj ndaej engq sang hag ndaej engq ak, bouxcoz lwgnyez hoh bouxlaux ninz ndaek gwn ndaej、ndang cangq souhgyaeu, caezgya miz gangj miz riu, byaek haeux gwn youq ndawbak van youq ndawsim.

Seizneix dauqngeix, gou cungj nanz ndaej lumz, couh lumj youq ngoenzlwenz ne, najriu vah angq cungj youq dangqnaj nei.

Ngoenz gvaq ngoenz, ndwen doek ndwen, laepda couh youh daengz cieng moq lo. Bineix, gij binghraq youh naek lo, daengx guek haujlai dieg miz, baez ngeix daengz neix, yienzbonj naemj dauqbae ranzcoj gvaq cieng duj dajsiu lo. Dahlwg youq Cwngzduh doegsaw, gou daj dienhvah naeuz:“Dahlwg, seizneix binghraq naek lai, mwngz mbouj ngah dauqranz lo, yungyiemj lailai, couh simnet youq hagdangz gvaq cieng ba!” Dahlwg dingq le raemxda laerikrik, caiq gangj mbouj ok saek coenz vah.

Dahlwg mbouj ndaej maranz, gou mbouj ndaej bae ranzcoj gvaq cieng, aensim cungj nyaeknyaeu linzlinz, hoeng mbouj miz banhfap. Baenzbaenz cungj youq ndwi, gou couh cujdung caeuq boux gunghcoz duiyenz ndaw cwngfuj roengz mbanj bae senhconz baenzlawz fuengzre binghraq, ndij vunzlai ndawmbanj doengzdoih dawzgeuq, fuengzre vunzrog daiq bingh haeuj mbanj.

Geij bi daeuj, gou genhciz banh ndei nungzminz vwnzyozse, itheij okbanj 《Reihnaz Saekgim》cib geiz. Vihliux gujli veiyenz sij faenzcieng, gou sai haujlai seizgan nyinhcaen bae caeuq caezgya gyauhliuz baenzlawz sij faenzcieng, hawj gij faenzcieng ndaw 《Reihnaz Saekgim》 cungj ndei.

Caenhneix, gou gyangngoenz riengz bae senhconz yawhfuengz binghraq, gyanghaemh sij faenzcieng bien gauj, yienznaeuz boenq hoeng roxnyinh ndaej sim netnwtnwt, cungjsuenq ndaej guh di saeh saed lo.

Youq cibgeij ngoenz gonq, Lungzlinz Yen miz vunz youq guekrog daiq bingh dauqranz, de hwzsonh genjcwz dwg yangzsing, Lungzlinz Yen sikhaek fung yienh. Ndaej daengz aen siusik neix, gou gibseiz cujciz gyoengq vunzmbanj, bae fung diuz roenz iq ndaw mbanj bae Lungzlinz Yen, ndaej daengz yanghcwngfuj haenh ndei.

Dangh gvaq raemxrongz rumzfwn,

Mwngz miz ingj miz ngaeuz,

Gyangngoenz mbwn laep ganj mbouj dingz,

Cij vih sengmingh lwgminz.

Ciep gvaq mbaw geizhoengz,

Miz mwngz cung bae gonq,

Hanh lae lumj raemx hix mbouj dingz,

Cij dawz cwzyin cuengq ndawsim.

Mwngz dwg ndawbiengz denhsij ceiq gyaeundei,

Gyaez mbouj rox caenh gamjdoengh diendeih,

Lwgminz youq gonq sengmingh youq gonq,

Doengzdoih sij ndei gizciz Cungguek.

Yienznaeuz souj go《Yinghyungz Ceiq Gyaeundei》 neix dwg gou sij, hoeng de baez yiengj youq henzrwz gou seiz, gou couh gamjdoengh ndaej raemxda lae roengzdaeuj. Dwg o, Cungguek bouxbing vih lwgminz youq ndaej bingzan, mbouj lau lae hanh vutmingh, gou siuj bi ndeu mbouj ndaej ndij vunzranz gvaq cieng youh baenzlawz ne?

Lumj gvaq cieng miz bauqva youq gwnz- mbwn dek ronghriri, gou ndunj youq ndawlaep muenghyawj gvaqbae, caen lwenqda ya! Caeuq gyoengq beixnuengx hoh coenz——

“Biguk angqyangz!”