Aen gyausiz dou youh gvangq youh hung, naengh ndaej 60 lai boux. Gyausiz dou lumj aen dieg cuengq nyapnyaj nei, aenvih hagseng cigban ban dou cungj mbouj baet deih, hagseng cigban cungj naeuz caj yaep ndeu caiq baet, hoeng caj nanznanz cungj mbouj miz vunz baet, banhcujyin dou mbwq yienghneix raixcaix, fad boux doengzhag mbouj baet deih lai baet geij ngoenz.

Gyausiz miz deih gou gyaez, hix miz deih gou mbouj gyaez. Mbouj gyaez geijlai dwg lauxsae hawj dou guh cozyez lailai, danghnaeuz lauxsae hawj dou guh cozyez noix di, dou couh vuenheij dangqmaz. Hoeng baeznaengz cuengqgyaj, cozyez couh daj boux vunz iqet bienqbaenz le boux vunz hung sang, ndigah dou ciengzseiz guh cozyez daengz gyanghwnz cungj raiz mbouj liux. Mboujgvaq, mbangjseiz lauxsae hix doiq dou ndei raixcaix, daegbied dwg lauxsae Yinghyij dou, de baeznaengz hwnjdangz cungj dawz di doxgaiq hawj dou gwn, vihneix dou gyaez dangzgoq de raixcaix.

Gou caen naemj miz aen gyausiz diendangz ndeu ha.

Aen gyausiz diendangz caeuq aen gyausiz bingzciengz mbouj doxdoengz, aen gyausiz diendangz dwg fungh dangzbingj. Bwzbanj ndaw gyausiz dwg gyaujgwzliz hau, hwzbanj dwg gyaujgwzliz ndaem, dennauj dwg dangz vandiemz, doengj- nyapnyaj dwg dangzcij duzdouq hau, sauqbaet caeuq dohbaj dwg dangznding, ceksaw dwg binghgizlinz. Dou seiz mbouj seiz gwn gaemz ndeu, haenx caen yinx lai lo. Danghnaeuz mbawgienj dwg naijyouz, couh ndaej aeu mbawgienj gwn roengz ndawdungx bae. Mwh lauxsae naeuz sou mbawgienj couh caeuq lauxsae naeuz：“Lauxsae gou gwn mbawgienj yaq, aenvih dungx gou iek lai.” Lauxsae hix mbouj ndaq dou, lauxsae couh naeuz:“Gwn mbawgienj yaq, hix ndaej swnhleih gvaqgvan.”

（Gveigangj Si Gangjbwz Gih Yensih Siujyoz Luz Sihcing）