(ciep geizgonq)

7 Dou Guhlawz Cungj Mbouj Hawj De Deuz Ndaej

Bijwnh youq banringzgvaq 6 diemj gven majdaz aenvat bae, daj dieg naengh hai de benz roengzdaeuj. Banghswh caeuq de doxlumj, goj daj gwnz aenvat benz roengzdaeuj. Song boux de hai aenvat baenz ngoenz, baeg dwk daengx ndang ndaj liux, gyoengqde dungx goj iek yaek dai. Gyoengqde menhmenh byaij haeuj gyawj bakcongh iq duz nyaenma haenx. Bijwnh hozhwnj dwk daengx naj aeuj liux. Banghswh yungh gij vah oepsoep ndaq mbouj dingz. Bozgizswh bibi buengq- buengq byaij gvaqdaeuj. “Ced meh de, duz nyaenma dai gaj mbouj aeu naj neix!” De naeuz, “raeuz seizneix guh- lawz guh?”

“Gou naemj doiq mwngz gangj, raeuz mbouj ndaej dingz fwngz,” Bijwnh naeuz, “raeuz mbouj ndaej hawj de deuz bae!”

“Raeuz guhlawz cungj mbouj hawj de deuz bae!” Banghswh hemq naeuz.

“Guhlawz cungj mbouj hawj、 guhlawz cungj mbouj hawj、 guhlawz cungj mbouj hawj!” Bozgizswh swenj naeuz.

“Mwngz dingq ndaej nyi mbouj, nyaenma sienseng?” Bijwnh goz aen- ndang roengzdaeuj doiq bakcongh hemq, “seizneix lij caengz suenq liux bw, nyaenma sienseng! Dou mbouj aeu mwngz lumj doxgaiq iq ityiengh hoij hwnjdaeuj hawj dai couh mbouj dauq ranz!” Yienghneix, sam boux vunz neix doxcaez gaem fwngz yiemzsuk mieng naeuz: Mbouj gaeb ndaej nyaenma, couh mbouj dauq bae ciengzdajciengx bonjfaenh.

“Yamq laeng guhlawz guh?” Bangh- swh daemqdet dungx bongz cam.

“Dou dajsuenq hawj mwngz haeuj congh bae neb de okdaeuj,” Bijwnh naeuz, “roengzbae lovei, mwngz boux- daemq hojlienz neix!”

“Gou mbouj roengzbae!” Banghswh swenj deuz lo.

Bijwnh naiqnuknuk riuriu. De baez riu, mwngz couh yawj ndaej raen gij hwkheuj ndingnyanznyanz lumj lwed de, caemhcaiq yawjraen hwkheuj lai gvaq heuj dem. “Baenzde seizneix dan miz gienh saeh ndeu guh ndaej lo,” De naeuz, “raeuz hawj de iek gag okdaeuj. Raeuz hwnzngoenz youq gizneix souj, dawz youq bakcongh neix. Daengz doeklaeng de haengjdingh okdaeuj. De haengjdingh okdaeuj.”

Yienghneix, Bozgizswh、Banghswh caeuq Bijwnh fak saenq bae hawj ciengz- dajciengx dinbya, hawj vunz soengq cangbungz、daehninz caeuq haeuxcaeuz hwnjdaeuj.