Haemhneix de gig mbouj cingq- ciengz, gij cingz gaenq mwnh gongj sawqmwh youh fukdauq lo, daj Siu Cuh ngeix daengz daxmeh de, gij sing daxmeh de youq baihrog miuhsaenz- vangz daej ndaej daep dek mbei cieg, lumjnaeuz lij youq henz rwz hap.

De fwt daj gwnz dongfiengz naengh hwnjdaeuj, song fwngz youq ndaw laep luenh va, lumj dangqnaj miz caengz doxgaiq maz laengzdangj de lo, itdingh aeu gaemhdawz le caiq mbek bae.

“Meh——”

Hemq sing ngoemh he le, de youh ninz roengzbae lo, goemq naj youq ndaw dongfiengz, raemxda lumj raemxmboq nei laeliklik.

Ngoenz daihngeih, gij bingh bouxfamhlaux ndei lai lo, de aeu fwngz riuj lienhgazdin, menhmenh ning ndang depgyawj Lungz Byauh.

“Vei, daegmbauq.”

Lungz Byauh baez fanndang, ninz youq gwnz dongfiengz ngiengxyawj de, ndaw lauz gig laep, byawz hix yawj mbouj cingcuj gwnz naj doiqfueng.

“Mwngz ndei lwi?”

“W, gyo’mbaiq mwngz.”

Coenz vah neix geijlai swnhbak ha! Siu Cuh hix gaenq baenzneix gangj gvaq.

“Hei, gaej yienghneix gangj.”

“Mwngz hix mbouj cwxcaih lwi?” Bouxfamhlaux haeujsim cam.

“Gou dwg ndawsim mbouj cwxcaih.”

“Huk!”

“Gou ndaej hag lumj mwngz yienghneix couh ndei lo, maz cungj mbouj dawz haeuj sim.”

“Daegmbauq, gou haeuj gizneix geijlai nanz, mwngz haeuj gizneix geijlai nanz le?”

“Mwngz haeuj geijlai nanz lo?”

“Gou hix geiq mbouj ndaej lo, aiq gvaq le cibgeij aen seizdoeng luba!”

“Ha!”

“Mwngz gaej simgip, caiq gvaq haj aen seizdoeng, couh menhmenh maz cungj mbouj dawz haeuj sim lo.”

“Ai—— Gou baenzlawz deng gyaeng baenzlai nanz ne?”

“Hei hei, lauheiq hix ca mbouj geijlai lo, dingqgangj mwngz dwg vunz lajfwngz ‘Vangzvaizgvaiq’ Byayauz?”

“Ien’uengj! Gou gaenbonj mbouj dwg……”(caengz sat)