Laj din ciengz miz aen cog nou ndeu, ndawde daeng ronghsagsag, ndoiq gyong daj laz, neix dwg maz saeh ne? O! Nyuenz dwg duznou yaek haq lwg.

Dahlwg duznou baenzsau, seizneix de yaek okhaq le, daxmeh cam daxboh naeuz:“Gvan, dahlwg raeuz haq hawj bouxlawz cij ndei ne?”

Daxboh dwg boux ngoengqngwt he, de gangj naeuz:“Bouxlawz hingzsaenz couh haq hawj de!” Songde doxyaeng daengz ranzrongh le, baez ngiengxgyaeuj yawjraen aen daengngoenz, songde nyinhnaeuz daengngoenz ceiq hingzsaenz, couh riuhoho cam daengngoenz:“Daengngoenz ha, mwngz ceiq hingzsaenz, gou yaek haq dahlwg gou hawj mwngz, mwngz aeu lwi?” Aen daengngoenz dingqnyi le, couh gangj naeuz:“Gou mbouj hingzsaenz, fwj baez daengz henz ndang gou, cw gou hwnjdaeuj, gou couh lau baenz saenzhawhaw lo!”

Daxboh duznou couh buetdeuz lo, daengz henz dujfwj le, couh riuhoho gangj naeuz:“Dujfwj ha, mwngz beij daengngoenz ak, gou yaek haq dahlwg gou hawj mwngz, mwngz nyienh aeu de bae guh yah mwngz lwi?” Dujfwj naeuz:“Gou mbouj miz maz ak ne, danghnaeuz raq rumz hung ndeu baez ci, gou couh deng de ci ndaej mbinngaungau lo!”

Daxboh duznou youh buetdeuz lo, de youq laj go faex hung ndeu deq raq rumz, baez raen couh angqvauvau naeuz:“Raq rumz ha, mwngz beij daengngoenz caeuq dujfwj lij hingzsaenz, gou yaek haq dahlwg gou hawj mwngz, mwngz aeu lwi?” Raq rumz gangj naeuz:“Gou miz maz hingzsaenz ne, fajciengz baez dangj baihnaj gou, gou couh deng daengx roengzdaeuj, baenaj mbouj ndaej lo! Mwngz bae ra fajciengz guh lwggwiz mwngz ba.”

Daxboh duznou youh buetdeuz lo, de angqfwtfwt ra faj ciengz he couh gangj:“Fajciengz ha, mwngz beij daengngoenz、 dujfwj caeuq raq rumz lij hingzsaenz, gou yaek haq dahlwg gou hawj mwngz, mwngz aeu lwi?” Fajciengz riuhaha gangj naeuz:“Duznou rox vat congh, duznou daengz neix baez vat congh, gou couh deng loemq roengzdaeuj lo!”

Daengngoenz lau fwj, fwj lau rumz, rumz lau ciengz, ciengz lau duznou, duznou lau byawz ne? Daxboh duznou bek ga hung riuhaha gangj:“Nyuenz dwg duzmeuz ceiq hingzsaenz, dahlwg gou wngdang haq hawj de.”

Gangj sat le, duznou couh ndoiq gyong daj laz, dahlwg duznou daenj buh nding naengh youq ndaw giuhva okhaq lo, gwnz roen youh eu fwen youh diuqfoux, mbouj geij nanz couh bae daengz ranz duzmeuz lo.

Duzmeuz ngamq hwnq mbonq, couh dingqnyi eu fwen laz yiengj, laihnaeuz ranzcawj de guh laeuj angq ne, baez ok rog bae yawj, cij rox dwg duznou soengq dahlwg daeuj haq hawj de, ndawsim angq raixcaix.

Ngoenzlaeng, duznou gvanbaz bae ranz duzmeuz yawj dahlwg, yawj ndaw yawj rog, yawj gwnz yawj laj, cungj mbouj raen dahlwg. Songde couh guhmuengz cam duzmeuz:“Lwggwiz ha, dou daeuj baenzlai nanz le cungj yawj mbouj raen dahlwg, de bae gyawz ne?” Duz meuz rizriz henz bak de, riuhoho naeuz:“Bohda mehdaiq ha, gou gyaez dahlwg sou lai, de gyaeundei lai, gou lau bouxwnq hangz de, couh coq de daengz ndaw bak ndwnj roengz ndaw dungx gou bae, yaeuq de hwnjdaeuj lo!”

Duznou gvanbaz dingqnyi le couh daej lo.