Ranzmbanj gou dwg Sanglinz, gizde bya heu raemx saw, gingjsaek gyaeundei hawj vunz simmaez.

Bya Sanglinz gyaeu, Byacwx ceiq gyaeu. Byacwx hungsang daengjsoh, ndoengfaex mwncupcup、heuswdswd, fwj mok hoenz- ngeungeu, raemxrij laesisi, dienheiq liengzsangj, caezgya cungj gangj Byacwx “cin miz hoenzngeungeu, hwngq miz raemx baenz dat, cou miz fwjhau dujduj, doeng miz nae maez vunz”, baenzbaenz Byacwx bi daengz byai seiqgeiq cungj miz gingjsaek gyaeundei caemhcaiq mbouj doxdoengz, mwhlawz cungj habngamj youzlangh.

Bya Sanglinz gyaeu raemx engq lengj, ndawde Huzdaihlungz dwg ceiq lengj. Raemx Huzdaihlungz heusausau, ndaw huz miz bya, bya ingj ndaw huz, raemx heux bya gienj. Huzdaihlungz lumj gaiq nyawhheu nei, dwg bouxsien ndoj youq ndaw bya Sanglinz, byawz maijgyaez de, cij ndaej daeuj yawj, hoeng mbouj ndaej daiq dauq ranz bae.

Sanglinz lij miz haujlai dieg gyaeu, lumjbaenz Dahyangzdu、Huzginhlenz、Fanhgujsuencaz…… Geq mbouj sat, gangj mbouj liux.

Sanglinz bya heu raemx saw hoengheiq ndei, naz biz ndaem ok haeux ciengx ndang. Lij miz vunz yienghneix gangj:“Haeuxsan Sanglinz hausaksak, ranzranz cawj ndaej homngaungau, mwngz langh mbouj saenq couh cimz yawj, mwngz itdingh haenh de mbouj dingz.”

Doeklaeng, eu hot fwen ndeu:

Gizdieg Sanglinz lumj naedcaw,

Bya heu raemx saw funghgingj gyaeu,

Gij huq ndeindup gizneix caeu,

Mbouj saenq mwngz aeu daeuj yawjyawj.