Sai:

Rox mwngz maij mbouj maij,

Gou guenj byaij guenj heuh,

Youq boux geuq boux geuq,

Gou guenj heuh geij coenz.

Mbwk:

Rox mwngz maij mbouj maij,

Yaeuh gou vaih simgei,

Rox mwngz ngeix mbouj ngeix,

Haih simgei gou luenh.

Sai:

Rox mwngz maij mbouj maij,

Gou guenj byaij guenj yiuq,

Mwngz baenzlai ndeiyiuq,

Maz cungj liuh daengz nuengx.

Mbwk:

Rox mwngz maij mbouj maij,

Youh hawj gou vaih sim,

Rox mwngz cim mbouj cim,

Yaeuh hawj sim gou yungz.

Sai:

Rox mwngz maij mbouj maij,

Gou guenj byaij guenj daeuj,

Youq ranz caemh raen gaeuj,

Gou guenj daeuj neix liuh.

Mbwk:

Rox mwngz maij mbouj maij,

Yaeuh gou vaih simdaeuz,

Rox mwngz aeu mbouj aeu,

Laeg yaeuh gou sim baih.

Sai:

Rox mwngz maij mbouj maij,

Gou guenj nai guenj daengq,

Rox mwngz saenq mbouj saenq,

Guenj daengq mwngz daeuj liuh.

Mbwk:

Rox mwngz maij mbouj maij,

Baih ndaej aen ukgyaeuj,

Rox mwngz aeu mbouj aeu,

Hawj gou ukgyaeuj luenh.

Sai:

Rox mwngz maij mbouj maij,

Gou guenj byaij guenj bae,

Caih mwngz haej(hawj) mbouj haej

(hawj),

Gou guenj gvaqbae liuh.

Mbwk:

Rox mwngz maij mbouj maij,

Hawj gou vaih dungxsaej,

Mwngz aeu ndaej mbouj ndaej,

Gou da daej ok lwed.

Sai:

Rox mwngz maij mbouj maij,

Gou guenj byaij guenj ra,

Rox mwngz haq caengz haq,

Gou guenj ra daeuj liuh.

Mbwk:

Rox mwngz maij mbouj maij,

Yaeuh gou vaih raemxda,

Youq gizwnq aeuyah,

Yaeuh raemxda gou roengz.

Sai:

Rox mwngz maij mbouj maij,

Gou guenj byaij guenj diuq,

Rox mwngz yiuq mbouj yiuq,

Gou guenj diuq daeuj liuh.

Mbwk:

Rox mwngz maij mbouj maij,

Yaeuh hawj gou vaih ndang,

Mwngz lij caeuq vunz gangj,

Gou vaih ndang vaih vunz.

Sai:

Rox mwngz maij mbouj maij,

Gou maij couh guenj gyumq,

Laepndwen doeng guenj sumh,

Gyumq mwngz gangj cingzngeih.

Mbwk:

Rox mwngz maij mbouj maij,

Yaeuh hawj gou vaih ga,

Rox mwngz ra mbouj ra,

Gou vaih ga daeuj lienh.

Sai:

Rox mwngz maij mbouj maij,

Gou guenj byaij guenj ngeix,

Nuengx mwngz ei mbouj ei,

Gou guenj ngeix guenj muengh.

Mbwk:

Rox mwngz maij mbouj maij,

Yaeuh hawj gou vaih damj,

Rox mwngz ngamq mbouj ngamq,

Gou mbouj gamj okrog.