Ndwen 12 ngoenz 17， Ginhcouh Si Ginhbwz Gih Yinzminz Fazyen、Ginhbwz Gih Swhfaz Giz youq Ginhcouh Si Ginhbwz Gih Yinzminz Fazyen Dasw Fazdingz lienzhab banh aen yizsiz biengj baiz “Aen Camh Guhhong Faplwd Bangcoh Cuengh Gun Song Vah”, neix dwg naeuz Aen Camh Guhhong Faplwd Bangcoh Cuengh Gun Song Vah daengx guek aen ndujlaeb youq fazdingz cingqsik venjbaiz laebbaenz. Doengzseiz lij banh yizsiz biengj baiz “Fungh Guhhong Dazcwngz” yungh mingzcoh bouxdiuzgaij Nungz Daz- cwngz heuh haenx Ginhbwz Gih Dasw Cin Yinzminz Diuzgaij Veij- yenzvei laeb youq Dasw Fazdingz. Neix dwg aen banhfap cauhmoq Ginhcouh Si Ginhbwz Gih Yinzminz Fazyen、Ginhbwz Gih Swhfaz Giz guh hoz- dung saedguh suyenz ceihleix caeuq hengzguh “gou vih vunzlai banh saedsaeh”.

Aen yizsiz biengj baiz sat le, gyoengqvunz camgya yizsiz caez yawjngonz Aen Cungsim Fugsaeh Dajgauq Dasw Fazdingz、Aen Camh Guhhong Faplwd Bangcoh Cuengh Gun Song Vah caeuq Fungh Guhhong Dazcwngz daengj dieg, bae roxyiuj Aen Camh Guhhong Faplwd Bangcoh Cuengh Gun Song Vah caeuq Fungh Guhhong Dazcwngz baenzlawz guh- hong.

Ciuq cam rox, Dasw Fazdingz guenj Dasw、Daciz、Nazmungz、Gveidaiz seiq aen yanghcin, diegguenj gyaeujvunz daih’iek 30 fanh, ndawde gyaeujvunz Bouxcuengh ciemq 70% doxhwnj, dwg dieg vunz Bouxcuengh youq lai aen si neix. Aen Camh Guhhong Faplwd Bangcoh Cuengh Gun Song Vah caeuq Fungh Guhhong Dazcwngz haeuj youq fazdingz, dwg fazyen caeuq swhfaz giz guhhong diuzgaij dajgauq aen haidaeuz ndei, hab saedsaeh dangdieg, mboujdan fuengbienh vunzlai gak cuz cingjbauq faplwd bangcoh caeuq hawj ngaek- ngeu doxceng youq gihcwngz gaijgez, hix mizleih yinzminz fazyen doicaenh suyenz ceihleix caeuq fazyen hoiz- soeng gij aplig anq lai vunz noix.

（Bangz Bingz Suh Dunghmeiz）