(ciep geizgonq)

Maex nyaenma daejnga’nga, de umj gvaq seiq duz lwg, got haeuj ndaw rungj maenhmaenh bae.

Sawqmwh, dingj gyaeuj gyoengqde cienz daeuj aen sing hunghung ndeu, fag so ndeu conq roengz dingj congh ma! Yawjraen gij doxgaiq dwglau neix, nyaenma sienseng lumj deng dienh nei diuq hwnj hemq naeuz: “Gou miz banhfap lo! Vaiq! Faen cung ndeu cungj mbouj ndaej nguh! Daxbaenh gou vihmaz siengj mbouj daengz!”

“Siengj daengz gijmaz, daxboh?”

“Nyaenma vat congh vaiq gvaq vunz!” Nyaenma sienseng doq hemq naeuz, doq hainduj vat, “gwnz seiqgyaiq mbouj miz bouxlawz vat congh vat ndaej vaiq gvaq nyaenma!”

Nyaenma sienseng dinghmaenh yungh nyauj naj bonjfaenh vat ok diuz roen lix roengzbae ndeu. Namh youq raeblaeng de mbin hwnj fofo. Maex nyaenma bongh hwnjbae bang de, seiq duz lwg goj bae bang.

“Vat doxroengz!” Nyaenma sienseng cijveih gyoengqde, “raeuz itdingh aeu vat roengzbae laeglaeg, yied laeg yied ndei!”

Deihgoengq riengz giz lingqlingq doxroengz, yied vat yied raez, yied vat yied laeg, liz gwnznamh yied daeuj yied gyae. Daxmeh、daxboh caeuq seiq duz lwg doxcaez vat, cibngeih aen nyauj doengh ndaej riengjvaiq. Menhmenh, gij sing caca fagso liz gyoengqde yied daeuj yied gyae lo.

Daihgaiq gvaqbae diemj cung ndeu, nyaenma sienseng dingz roengzdaeuj, gangj: “Dingz!” Gyoengqde cungj dingz roengzdaeuj lo. Nyaenma sienseng daengx ranz baenq ndang yawj diuz deihgoengq raezraez baihlaeng ngamq vat okdaeuj, bouxlawz goj mbouj gangjvah. “Hu!” Nyaenma sienseng hai bak naeuz, “gou yawj raeuz suenq dwg duetliz yungyiemj lo! Gyoengqde mbouj gojnaengz vat roengzma baenzneix laeg. Daihgya guh ndaej ndei lai!”

Gyoengqde naengh roengzma, yietbaeg yaep ndeu, diemcaw. Seizneix, maex nyaenma doiq gyoengq lwg naeuz: “Gou aeu naeuz sou, daxbaenh danghnaeuz mbouj dwg daxboh sou, raeuz seizneix senqsi couh mbouj miz mingh lo. Daxboh gyoengqsou dwg duz nyaenma ak raixcaix ndeu!”

Nyaenma sienseng yawj haeuj maex de bae, maex de goj yawj de riu. Dingq maex bonjfaenh gangj ok cungj vah neix, nyaenma sienseng engq maij de lo.