Ngoenznaengz yawjraen mbaw hungzlingjginh ronghsien youq najaek raeuz, gou roxnyinh miznaj lai, de dwg gak hungzgiz ndeu, gou vih de ndaengndiengq！

Cungguek moq dwg haujlai gwzming banlaux yungh mingh caeuq lwed vuenh ndaej daeuj, raeuz aeu insik ndwenngoenz ngoenzneix. Raeuz aeu ceng dang boux lwgnyez ndei seizdaih moq gyaez guekcoj、gyaez beksingq. Mboujlwnh seizlawz dieglawz cungj aeu yiemzgek iugouz bonjfaenh, roengzrengz hag, ciuqei siujhagseng soujcwz, daj saeh iq guh hwnj, daj gou guh hwnj, caeuq vunzhung doxcaez cauh aen biengz vwnzmingz huzndei ndeu.

Mboengqneix gou guh gienh saeh iq ndeu. Nanzningz cingq cauhlaeb aen hawsingz vwnzmingz yienghndei daengx guek, gou caeuq daxmeh gaenxmaenx camgya aen doih bouxgagnyienh, bae ndaw siujgih gip nyapnyaj. Youq gungx siujgih ndeu, dou yawj miz nyapnyaj lailai. Gou yawj dieg neix baenzneix uq, naemj：“Wnggai baenzlawz gip ha？ Cungj hong youh baeg youh uq neix, gou caengz guh gvaq ne.” Mwh gou cingq doiqlaeng, daxmeh lumj yawj rox sim naemj gou, riu naeuz：“Lwg ha, mwngz gaej laihnaeuz bae dwkciengq、henhoh guekgya cij suenq gyaez guek. Gizsaed, guh ndei moix gienh saeh iq henzgyawj raeuz, hix dwg gyaez guekcoj. Lumjbaenz, gip nyapnyaj ndaej baujhoh vanzging veiswngh, hawj aen hawsingz raeuz bienq ndaej engqgya seuqcengh、gyaeundei.” Dingq vah neix yaq, gou sawqmwh singj gvaqdaeuj, baenzneix hag yiengh daxmeh, ngaem gyaeuj roengzdaeuj nyinhcaen gip nyapnyaj. Gvaq haujlai nanz, mbawfaex、hab’ien、ceij dieg neix cungj deng dou gip seuq liux. Yawjraen siujgih seuqcengh, gou angq dangqmaz.

(Nanzningz Si Cunghhingh Siujyoz Cau Liyuz)