Raen daxmeh guh fwen, ndawsim gou humz- nyabnyab, nyaenx gou couh ciengq go hwnjdaeuj:

“Mwngz hai youq laj daengngoenz, coh heuhguh vagim,

Mwngz hai youq lai ronghndwen, coh heuhguh va’ngaenz,

Va mwngz ronghriri, bouxlawz daeuj ndaej bij(beij)?

Gaeu de heu, mbaw de loeg, yawj bae daengx da doek,

Daeuj lo daeuj,

, Vagimngaenz, mwngz miz cingz, mwngz miz eiq……”

Mehlwg youq ndaw bya fwen hwnj fwen roengz, mbouj rox daengngoenz seizlawz doek roengz bo? Seizde, mbouj miz cung venj caeuq soujbiuj, guhhong souhong cij ndaej yawj aen daengngoenz guhgoek. Daxmeh naeuz:“Raeuz dauqbae lo!” Yienzhaeuh de couh aemq daeh vagimngaenz youq gizsang byaij roengzdaeuj, gou ngamq gip ndaej byongh daeh ndeu. Youq mwh gou byaij roengzdaeuj seiz, ngaiz gaeu vagimngaenz laeuz haeuj din daeuj, gou couh hoemjgoep lo, din swix loemq roengz congh rin bae, lwed lae mbouj dingz. Daxmeh yungh fag caxliemz gvej buh de, gip go ywdoj dub lanh ok raemx baeng haeuj giz sieng gou bae, caiq aeu baengz buh de suek gij sieng gou, cij aemq gou dauqranz. Daxmeh aemq gou bae ndaej duenh roen ndeu cuengq roengz, youh byaij dauqlaeng aeu daeh vagimngaenz, baebae dauqdauq cib lai mbat, daengz ronghndwen hwnj bo le, dou cij dauq daengz ranz.

Mwhde, aenvih baksieng gou mbouj ndaej siudoeg ndei, gvaqlaeng baksieng fanj in moq, faj din swix foeg lumj aen haeuxfaengx nei, youh ndongj youh in. Daxmeh dauzheiq lo, buet daengz mbanjrog bae heuh boux canghyw doj daeuj hawj gou ywbingh. Seizde, ndawranz hojgungz, daxboh youh baenz bingh fungheiq, mbouj ndaej guhhong, cungj dwg daxmeh bae ra ngaenz. Daxmeh vihliux gou caeuq daxboh ndaej ywbingh, ciengzciengz hwnq romh haeuj rungh haeuj bya bae ra go baenz ngaenz bae gai, mbangjseiz lij bungq daengz ngwzdoeg haep. It bi seiq geiq, ndaw rungh ndaw bya cungj miz rizdin daxmeh. Doeklaeng, gij bingh daxboh caeuq gou ndaej yw ndei lo. Seizneix, gij din gou lij ce miz aen biuj seizde bungq, baez yawjraen aen biuj neix, couh lumj yawjraen daxmeh nei.

Gyoengq dou gyaez sij di faenzcieng guh aen vwnzyozse, heuhguh Nazlauz Nungzminz Vwnzyozse, ndawde miz boux veiyenz ndeu heuhguh Vangz Ginhbungz. De dwg bi 2018 haeuj ndaw vwnzyozse daeuj, gaxgonq de sij haujlai faenzcieng ndaej fatbiuj, gou yawj gvaq faenzcieng de, hoeng caengz ndaej raen gvaq de. Bi’gvaq ndwen haj ngoenz it, vwnzyozse dou youh doxcomz, de hai aen cimohdoz sai le sam aen lai cungdaeuz ganj daeuj, mwhde gou cij ndaej raen naj de. De sang saek miz mij roek haj, byomregreg, mbouj maij gangj vah geijlai.

Bineix, dwg vwnzyozse dou laebbaenz gouj hopbi, gou iucingj yienh rog veiyenz daeuj doxcomz, de hix daeuj lo. Guh hozdung liux lo, gou iu de daengz ranz gou gwn laeuj. De daj aen daeh aemq de dawz bingz laeujdoj he okdaeuj, caiq dawz aen daeh he okdaeuj ndenq hawj gou. Gou cam:“Neix dwg maz?” De naeuz:“Vagimngaenz!” Gou doeksaet lo, gij heiq rang yaep seiz ndonj haeuj ndaw ndaeng gou daeuj, con haeuj ndaw bwt gou bae. Haeujsim menh yawj, vagimngaenz lij ndij mbaw doxrangh, gij mbaw heusauj, gij va henjgim.

Vangz Ginhbungz naeuz:“Secangj, bi’gvaq daxmeh gou itcig baenzbingh, gou couh youq ranz ganq daxmeh. Duenh gyawj neix, daxmeh ndaw ndat okhaex mbouj daeuj, gou dingq vunz naeuz, vagimngaenz goj ndaej siundat gejdoeg, gou ndonj cib rungh gouj bya, ra cib bo gouj dat, cij ra raen go vagimngaenz. Gou rox mwngz miz bingh hezyaz sang, swnhbienh dawz di vagimngaenz hawj mwngz, maqmuengh mwngz ndang ndei ndang cangq!”

Gou baez dingq, gaem fwngz de maenh- ndaetndaet, raemxda gou iemq youq baihndaw, gangj mbouj okbak lo.（2 sat）