Raeuz ciengzseiz haenh bouxwnq, dauqfanj haenh bonj- faenh gig noix. Mboengqgonq, gou youq ndawsim gag haenh bonjfaenh, aenvih gou guh le gienh saeh genjdanh cix mbouj bingzciengz ndeu.

Ndaw gyajseizndat banhaet ngoenz ndeu, gou youq ranz raiz cozyez sat le, mbwq lai couh loengh doxgaiq guhcaemz. Mwh neix, daxbuz youq bakcauq guh- hong haenx hemq naeuz：“Lan ha, mwngz bae bang daxbuz cawx bingz meiq ba.” Dingq le vah daxbuz, gou sikhaek aeu cienz couh roengz laeuz lo.

Byaij youq gwnz roen, ngiengx gyaeuj yawjraen mbwn lamzswdswd, dingq sing roeg heuh “cicicaca”, gou simcingz soeng- sad.

Yaep ndeu, gou couh daengz aen bouq gai doxgaiq bakdou siujgih lo. Haeuj bouq gai doxgaiq bae, yawjraen saejdaeuz baiz dem baiz, gou yawj dwk myaiz rihnangnang. Gou youq baihnaj gyaq baij saejdaeuz baenq bae baenq dauq, naemj cawx di saejdaeuz bonjfaenh gyaez gwn haenx dangqmaz. Hoeng cawx le saejdaeuz, couh mbouj miz cienz cawx meiq lo, baenzlawz guh ne? Nanzdauh couh mbouj miz banh- fap song loh cungj guh ndaej lwi?

Naemj dwk naemj dwk, ndawsim gou lumjbaenz miz song boux vunz iq doxdub, boux ndeu naeuz：“Cawx saejdaeuz ba, dauqranz couh caeuq daxbuz naeuz meiq cungj gai liux lo.” Lingh boux naeuz：“Mbouj ndaej, gaenq dapwngq daxbuz aeu cawx meiq, guh vunz aeu gangj daengz guh daengz, mbouj ndaej gangj- yaeuh.” Gou lawq yaep ndeu, lijdwg gietdingh cawx bingz meiq ndeu baema.

Dauq daengz ranz le, daxbuz raen bingz meiq gou cawx dauqma haenx riunyumnyum, haenh naeuz：“Lan ranz raeuz caen mbouj loek, bang daxbuz guh saeh ndaej lo.” Dingq le vah daxbuz, gou angq dangqmaz, gou lij youq ndawsim daengj lwg- fwngzmeh haenh bonjfaenh.

Gienh saeh neix hawj gou rox： Guh vunz itdingh gangj daengz guh daengz, mbouj ndaej vih leih’ik bonjfaenh cix gangj- yaeuh.

(Vuz Yihangz)