Mwh gou lij deng umj gyang rungh, binaengz guekgingq caeuq ndwencieng dauq ranz daxbuz daxgoeng Huznanz, daxboh daxmeh cungj umj gou bae naengh hojceh. Seizhaenx hojceh raezrang- rang, bangj geu buh saekheu, daxboh daxmeh heuh de dwg hojceh naengheu.

Daxmeh cungj naeuz, hojceh naengheu hai ndaej menh raixcaix, diemj cung ngamq hai ndaej 70 lai goengleix, gyang roen lij dingz haujlai aen camh, aeu naengh 13 diemj cung baedauq cijndaej daengz Huznanz. Seizhaenx, vihnaengh hojceh cungj naengh miz vunz, dieg gvaq roen lij ndwn miz haujlai vunz dauqranz dem, bae diengzhaex yaek baiz doih raezrangrang. Mizseiz hojceh lijcaengz miz gungh- diuz, gwnz ci gaiqgwn gai hix noix, naengh baez ci ndeu, caezgya gwnznaj lwenqlwdlwd、ndang niunwdnwd, daengx ndang mbouj cwxcaih.

Daj bi 2014 byonghbilaeng hainduj, aen hojceh dou moix baez naengh dauq ranzlaux Huznanz bienq ndaej mbouj doengz lo. Hojceh saekheu bienqbaenz hojceh saekhau, lumj naed “bikmax”, gyaeuj ci caeuq ndang ci yaenq miz “huzswnhhauh” sam cih saw hung, diemj cung ceiq vaiq hai ndaej 200 goengleix, dauq daengz ranz daxgoeng daxbuz ngamq aeu 5 diemj cung. “Huzswnhhauh” seuq cengh, rumz gunghdiuz ci okdaeuj miz di hom, miz haujlai saejdaeuz gai, daegbied dwg makit caeuq gagaeq gou ceiq gyaez gwn haenx. Lijmiz “fukhwng’hauh” hojceh, de hai ndaej engq vaiq, engq onj, daek boi raemx cuengq gwnz vihnaengh hix mbouj biu saek di. Daj cuengci yawj coh baihrog, gingjsaek song henz roen hix yied daeuj yied gyaeundei, laeuzsang hawsingz aen dem aen sangngaungau, bya bienq ndaej engq heu, raemx bienq ndaej engq saw.

Daxmeh naeuz, diuzroen dauqranz lij dwg raezrangrang, hoeng seizgan naengh hojceh yied daeuj yied dinj, neix dwg naeuz guekgya bienq ndaej yied daeuj yied hung’ak, ndwenngoenz raeuz hix bienq ndaej yied daeuj yied gyaeundei. Gou caijsoq ndei ndaej youq aen guekgya hungmbwk neix gvaq ndwenngoenz, gou aeu insik gij ndwenngoenz vuenyungz seizneix, hag rox gyo’mbaiq, hag rox haenqguh baenaj, cengguh boux lwgnyez ndei seizdaih moq.

(Nanzningz Si Fungsiengz Lu Siujyoz Gingjveih Yaugih Cinz Yigoj )