Siz Ginbingz cungjsuhgi cazyawj Gvangjsih Minzcuz Bozvuzgvanj gangj daengz cit denyingj 《Liuz Sanhcej》, de nyinhnaeuz cit neix “ndaej yienh’ok Cunghvaz Minzcuz、hajcib roek aen minzcuz hwngfoedfoed、doxgiet yungzhab、gaenxmaenx baenaj”.

Cit denyingj 《Liuz Sanhcej》youq bi 1961 ingj, gij doxdawz ndaw denyingj cungj aeu doiqfwen eu okdaeuj, dawz gij minzsug vwnzva caeuq gyacizgvanh minzcuz yungzhaeuj aen eiqsik hingzdai cawjdaeuz bae, cienzboq minzcuz doxgiet an’onj. Daj gij vwnzva Sanhcej ndaej yawjraen duzngaeuz hawfwen vwnzva Bouxcuengh. Vwnzva Liuz Sanhcej dwg gij daibyauj vwnzva Bouxcuengh, caiq cab miz Bouxgun、Dungcuz、Myauzcuz、Yauzcuz、Mulaujcuz、Mauznanzcuz daengj lai aen minzcuz vwnzva yenzsu. Youq gih raeuz, doengh aen minzcuz neix cungj riuz miz gij cienzgangj Liuz Sanhcej. Couhdwg naeuz vwnzva Liuz Sanhcej dwg cungj vwnzva lai dieg doxgyau doxyungz ndeu, baijok gak minzcuz doxgyau doxyungz doxbaedauq, caemhcaiq vih cauhguh aen Cunghvaz Minzcuz caezcaemh ndeu、cukmaenh gij eiqsik caezcaemh Cunghvaz Minzcuz daj ndei giekdaej.

Riengz ginghci hwngfat、gyaudoeng engq fuengbienh、minzcuz lijyouz hwngfat hoenghhwd, gij vwnzva Liuz Sanhcej caemh riengz dwk cienz ok rog bae. Doengh aen diegbaeyouz caeuq Sanhcej mizgven laeng Gveilinz、Liujcouh、Yizcouh daengj youq daengx guek cungj gig mizmingz. Cit heiq 《Yaenqsiengq · Liuz Sanhcej》aeu vwnzva canjnieb moq bae biujyienj, vunzlai cungj gig maij yawj, de yienh’ok gijmaz dwg “aeu vwnzva guh lijyouz、aeu lijyouz langhbaij vwnzva”. Nanzningz Gozci Minzgohcez dwg Cunghgoz Dunghmungz Bozlanjvei cit heiq youqgaenj ndeu, gij fwen gih raeuz ndaej eu ok Dunghnanzya bae. Riengz lizsij baenaj, gij vwnzva Liuz Sanhcej caemh vuenh yienghmoq, rengzhoengh raeuh. Gyawj geij bi neix, vunzlai Gvangjsih maij youq gwnzmuengx eu fwen, cungj hingzsik moq neix yienh’ok gij daegsaek seizdaih moq.

Lai aen minzcuz gih raeuz cungj eu fwen , dwg aenvih gyoengqde nyinhdoengz caemhcaiq supaeu cungj vwnzva ndei neix, coicaenh cauhguh aen Cunghvaz caezcaemh ndeu、cukmaenh gij eiqsik caezcaemh Cunghvaz , hawj gij gihyinh vwnzva Liuz Sanhcej ndaej ce roengzdaeuj、riuz roengzbae.

(Gvangjsih Minzcuz Yenzgiu Cunghsinh hawj gauj)