Ngiengxgyaeuj yawjyawj Bya- dunghyinz sangngaungau, fwjmok mumjgyumq heuxgeuj, ndit rongh cik gvaq fwjmok, dak ndaej lwgda de gig in.

De youh cengqgengz yaek ndwn hwnjdaeuj, hoeng mbouj ndaej, giujdin saenzdwddwd, riuj mbouj hwnj din, de danq le gaemz heiq ndeu, youh naengh roengzbae lo.

——Ah Gwnh ha Ah Gwnh, mbouj dwg gou mbouj gouq mwngz, gou saedcaih mbouj miz banhfap lo……

De doq ngeix doq simcieg lumhlumh cungqdinj cap youq gwnz gyaeujvaq.

——Aiq gyaep mbouj hwnj lo, couhdwg gyaep ndaej hwnj, seizneix gou gaenq mbouj miz geijlai rengz lo, baenzlawz doiqfouq ndaej gyoengq caeggeq de ne?

Siengj daengz gizneix, de doek- naiq lo, gwnz ndang engq mbouj miz rengz lo, hixnaengz ing youq ndaek rin he yietnaiq.

Deng a, seizneix aiq lienz gij rengz dwkcungq cungj mbouj miz lo, baenzlawz ndaej dawz fag cungq he gag bae gyaep gyoengq caeggeq ne?

Baez yietnaiq, de engq roxnyinh naetnaiq raixcaix, cij ndaej cengq da dangxgaemz muengh coh diuz roennou haeuj ndaw bya, song ga bonjfaenh mbouj dingqgangj, unqnemnem ndaej lumj gij mienhdiuz ndaw rek cawj nei, daengj mbouj hwnj lo.

Daihcibngux Aulungz- gveiz Gangj Goj (Daihbet)

Daengngoenz gaenq hwnj ndaej gig sang lo, couhcinj mwhneix lij miz rengz caiq gyaep hwnjbae, hoeng liz ndaej daiq gyae, gaenbonj gyaep mbouj ndaej lo.

Lungz Byauh danqheiq baez ndeu, hozgaek dawz ok cungqdinj, dwk coh gwnz bya mbat he, “bung——”, ndaw lueg hap dwk, geij duz roeg iq gwnz gofaex henzgyawj deng haep ndaej bekfwed mbin bae dieggyae.

Dwk le mbat cungq, lumjnaeuz mbouj baenzneix hozgaek lo, de ndwn hwnjdaeuj cienq ndang roengzbya maranz, rag gij ga nanq, baez yamq baez yamq byaij.

Mwhneix, de cij siengj daengz Siu Cuh, caen hojlienz, haq hawj Ah Gwnh gvaq gij saedceij vuenyungz ngamq ndaej bi lai, couh oksaeh lo, laeq lwgnding ngamq rim ndwen couh mbouj miz daxboh, doeklaeng gij ndwenngoenz raezrangrang neix……

“Bemx!”

Lungz Byauh sawqmwh gag heuh oksing daeuj, seizneix ndawsim de cij siengj daengz gwnz ndang Siu Cuh ndwi lo, de yaep ndeu vih Siu Cuh siengsim, hojlienz de deng nanh, yaep ndeu youh vih Siu Cuh deng nanh angqvau, byawz hawj de haq hawj ranz bouxmiz ne? Danghnaeuz caj bonjfaenh dauqma haq guh yah bonjfaenh, baenzneix gij saeh haemh- lwenz couh mbouj naznangq de lo? Ah Gwnh deng laiqcaemq miz de maz saeh?

Daengngoenz yied bin yied sang lo, de dauqlaeng byaij le gig nanz, cij roengz bya bae.

——Yaep he mbouj rox baenz- lawz nai de.

De lij naemj Siu Cuh, hix deng, Siu Cuh youq seizneix raen daengz de, caen mbouj cwxcaih ha!

“Bung!”(caengz sat)