Mwh lij doegsaw, gou ngoenzngoenz cungj maqmuengh ndaej raen doengzhag Lij Vwnzgvangj, hoeng saek baez naj doiq naj bungz de, youh mbouj gamj cimyawj de, laebluenh yawj gvaq lingh giz bae, caj damhdingh le cang yiengh fouzeiq ngeux gyaeuj yawj saek da, de cix senq byaij deuz gyae lo.

Daeg Lij Vwnzgvangj neix nem gou caemh ban. “Bouxvunz haemq sangsed, gvaigvet youh ndeingonz, miz di lau najmong, mbouj haengj comz riengz doih.”

Baezbaez cuengqhag, daengx gyoengq doengz- hag cungj byaijroedroed ok bakdou hagdangz, mwhde, gou cungj haengj riengz baihlaeng Lij Vwnzgvangj byaij youq gyang doih vunzlai. Gwq byaij gwq byaij, de fwtfwh ndonj haeuj aen bakgvaengh gwnz gai ndeu bae, daj dougvaengh yawj haeujbae, raen baihndaw miz gogaeu makit ndeu maj ndaej mwncupcup, cw daengx hongh raemhrwdrwd. Gou ngeix, lwg gwnz haw caen ndei.

Mbouj doegsaw le, gou engqgya siengj raen Lij Vwnzgvangj. “Nyinhdingh boux vunz ndei, ciengzseiz gag bae siengj, daeg de miz yienghsiengq, muengh ndaej nem guhcaemz.” Doeklaeng raen daengz gyoengq cejnuengx doengzdoih ndaw mbanj cungj gonqlaeng ndaej vunz bang gaisau haq ndaej bouxgvan baenzmbauq caemhcaiq saedceij gvaq ndaej vuenyungz raixcaix, gou roxnyinh bonjfaenh caen mbouj hab doih, lumj “lw” roengzdaeuj nei. Gwnz haw geij naihlaux haengj gaisau lwgsau lwgmbauq roxnaj guhyoux hix daeuj ra gou, yaek heuh gou bae nem lwgmbauq mbanj wnq roxnaj, hoeng gou cungj mbouj han bak. Ndaw hoz gag naemj, danghnaeuz heuh gou bae nem Lij Vwnzgvangj gangj couh ndei lo, naeuz mbouj dingh gou couh miz gihvei ndaej bienqbaenz vunz gwnz haw lo.

Laebdaeb geij bi cungj mbouj raen naj Lij Vwnzgvangj gvaq, dingqnyi naeuz de gaenq riengz vunz bae Guengjdoeng dajgoeng lo, caenh raen ranz de makit dawz aen hoij rim hongh, gig ndeiyawj, nyex vunz hoz ngah. Gou cungj ngeix mbouj doeng, de vihmaz bae Guengjdoeng nyaenx gyae dajgoeng, youq dieg gyawj raeuz neix mbouj ndaej ha?

Sawqmwh miz ngoenz ndeu, ranz Lij Vwnzgvangj vunz goenjoo, nauhyied dangqmaz. Rog bakgvaengh nem doiq ndingfwgfwg, baihndaw laeuj noh hom’oetoet okdaeuj, sing caimax hemqlwdlwd, gingdoengh daengx haw. Lij Vwnzgvangj aeu maex lo, saekseiz raen maex de riengz de byaij ok gwnz gai daeuj, maex de cang ndaej lengjlili, naj iq ndaeng ndiengq.

Gou hix haq lo, haq ndaej gyae’gyanggyang, seng miz song dah lwg, dahdah cungj gvai, doegsaw gangj it yiuj ngeih, doeklaeng cungj ndaej bae Baekging doeg daihhag. Dou song gyanyah gaenxgyaek ndaem naz ndaem reih, lij hwnj ndoi bae ndaem faex, hix laeuq ndaej di cienz, caemh bae gwnz haw cawx dieg hwnj ranz lo.

Song dah lwg cuengqgyaj dauqma, hix youq laeng hongh ndaem go makit ndeu, go makit hix maj ndaej mwncupcup raemhrwdrwd, mbouj geij nanz hix dawz mak baenz foengq baenz foengq hoij rim hongh. Ngoenz youq laj gaq makit yietliengz, gou ciengzseiz mbouj rox mbouj nyinh gag ngeix daengz Lij Vwnzgvangj.

Nanz mbouj nanz dauqbae ranzmeh, byaij gvaq diuz gai naj bakgvaengh Lij Vwnzgvangj, baezbaez cungj raen dou haep dwk, go makit de mbouj rox seizlawz gaenq dairoz lo……

Ceiq gaenh baez ndeu gou bae ranzmeh yawj bouxlaux, gvaq gwnz haw baih ranzmeh, raen gwnz ciengz ndaw hongh Lij Vwnzgvangj dauq maj hwnj nge gaeu makit heu mbaw oiqupup. Ngoenzhaenx gou yaek dauqdaeuj ranzgvan, ngamq okdaeuj daengz bak haw, roeb goenglaux rap doiq daeh- byukngwz bongzbuet ndeu, ngaemgyaeuj byaij- ngoegngoeg, goeng de mumhyat byoem raezsauz, buhvaq nguixngamx lauheiq miz buenq ndwen mbouj rieg lo, ndaw daehbyukngwz aiq dwg coux doengh gij bingz suliu, goeng neix yawj bae miz di lumj Lij Vwnzgvangj. Caen doeksaet, nyaenx lai bi mbouj raen, gou mbouj gamj haengjdingh dwg mbouj dwg de. Danghnaeuz caen dwg Lij Vwnzgvangj, de guhlawz bienqbaenz yienghneix?

Gyanghaemh, gou hwnj gwnz vangj haeuj aen “ginzdoengzhag” bae cam, cij rox Lij Vwnzgvangj geij bi neix gvaq ndaej mbouj daih ndei, yah de senq deuz bae lingh haq vunz lo, song boux lwg de lij youq ndaw singz aen gisuz yozyau ndeu doegsaw, seizneix ranz de dwg ranzgungzhoj ndaej cwngfuj bangfuz, ndaej lingx dihbauj, lij ndaej anbaiz guh boux beuj nyapnyaj.

Gou gyangz gaemz heiq raezrangrang ndeu, baez yaepda dou couh bienq laux lo, ciuhvunz hix mbouj doxdoengz lo, maqmuengh de ngoenzlaeng saedceij ndaej dauq ndei hwnjdaeuj.