Baenzlai lauxsae, gou yaenqsiengq ceiq laeg couhdwg Lij lauxsae lo.

Gou dwg boux hagseng capban, mwh ngeih nienzgaep cienj daengz aen ban neix, mboujdan najseng youh lau lauxsae caeuq doengzhag gizneix, aenvih dwg hagseng capban, mbouj roxnaj doengzhag, lumj deng golaeb nei. Baez daih’it goq banhoih, Lij lauxsae gaisau gou hawj doengzhag ndaw ban rox, doengzhag ndaw ban hix caeuq gou cam ndei doxgot. Neix hawj aen sim mbouj onj gou menhmenh soeng roengzdaeuj.

Miz ngoenz ndeu, sing lingz hwnjdangz yiengj lo, lauxsae hawj doengzhag boih govwnz, gou caepcawq ndei le, couh naengh cingq youq gizhaenx, caj lauxsae diemj mingz, caen dahraix, lauxsae senj deng gou lo, hawj gou ndwn hwnjdaeuj boih saw. Ngamq hainduj gou boih ndaej raeuzrad, daengz doeklaeng gou sawqmwh lumz lo, sim gou hainduj vueng hwnjdaeuj, gou ngiengx gyaeuj yawjyawj lauxsae, dan raen lauxsae riunyum coh gou ngaek- ngaek gyaeuj, lumjnaeuz cingq naeuz:“Boih ndaej ndei, gaej vueng.” Couh aenvih gij hengz- doengh iq lauxsae, dajciengj gou haujlai. Mbouj daengz faen cung ndeu, gou couh boih liux lo. Lauxsae heuh gou naengh roengzdaeuj, de daeujdaengz henzgyawj gou, laeg- lemx naeuz:“Gizsaed haxbaenh mwngz boih ndaej haemq ndei, mwngz aeu saenq bonjfaenh, lauxsae saenq mwngz baezlaeng haengjdingh boih ndaej engq raeuzrad.” Gou yungh rengz ngaekngaek gyaeuj. Goqdangz lij laebdaeb hwnj, gou muengh yawj rog cueng mbat ndeu, mbwn, caen lamz! Fwj, caen hau!

Gvaqlaeng, moix baez gou bungz daengz hojnanz, lauxsae cungj okdaeuj bang, bang gou gvaq nanzgvan; mwh gou doeknaiq hawj gou saenqsim, dajciengj gou, caeuq gou caezcaemh angqyangz, caezcaemh majhung.

De couhdwg Lij lauxsae, lauxsae ndei gou!

(Nanzningz Si Gyanghnanz Gih Siuj- yoz Ginhih Yaugih Luz Yaujdungz bouxhoiz：Cwz Fanghdingz)