Bouxlaux naeuz: Gwnhaeux ngeix boux guh nazreih, daenjbuh naemj boux ietfaiq. Gvaq swngh- hoz, raeuz wngdang aeu mbaet gwn mbaet yungh, fanjdui saiyaix, insik naedhaeux. Mbaet gwn mbaet yungh dwg binjdwz ndei guek raeuz daihdaih riuz roengzdaeuj, seizneix raeuz gwndaenj yienznaeuz mbouj you, hoeng, mbaet gwn mbaet yungh, geij cih saw neix lij engqgya miz yiyi.

Youq seiz gou doeg youwzyenz, gwnhaeux gonq lauxsae cungj heuh dou boih souj sei he:“Byawz rox haeux ndaw vanj, naednaed cungj sinhoj.” Eiqsei lwnh raeuz nyi aeu daj iq rox insik naedhaeux, aen dauhleix neix bouxcoz bouxlaux cungj rox. Hoeng, mbouj dwg haeuj ngviz haeuj uk moix boux vunz bae. Ndaw hagdangz sizdangz dieg cuengq vanjdawh, lajdeih dauqcawq cungj dwg ngaiz byaek, manzdouz mbouj caengz gwn saek gaemz couh deng ndek ndaw doengjmou. Ndaw diemqlaeuj daiz dem daiz byaek lw ngaiz lw, haujlai vunz cungj yiem dajbau baema doeknaj couh yienghneix dawz bae vut lo……Lumj yienghneix saiyaix youq henzndang raeuz seizlawz gizlawz cungj raen, hoeng, miz haujlai vunz cungj lumj boux dafangz dangq yawj mbouj raen, gyoengqde cungj ra gyaijbak hawj swhgeij, gyoengqde mbouj rox, neix dwg saiyaix sevei swhyenz, raeuz byawz hix mbouj miz lijyouz bae saiyaix.

Youq gwnz lizsij, mbaet gwn mbaet yungh gij cienzdoengj ndei youq moix aen seizdaih cungj miz.

Cuh Yenzcangh de ciuhvunz genhciz mbaet gwn mbaet yungh, dawz swhgeij guhyiengh. De dwg lwg bouxvunz guh nazreih, mwh de guh vuengzdaeq le hix mbouj lumj vuengzdaeq gaxgonq: Moix ngoenz mbouj dwg gwn duz gwnzmbwn mbin couhdwg gwn duz ndaw raemx youz. Youq ranzmbanj de Fung’yangz, lij miz cienzgangj seiq yiengh byaek yiengh dang ndeu, de bang yah de gvaq ngoenzseng, cij cawj lauxbaeg、coenggep、song vanj byaek heu、daeuhfouh cawj dang cuengq di coeng ndeu cingj gyoengqhak gwn. De lij laeb miz gvigawj: Doeklaeng mboujlwnh byawz cingj hek, cijnaengz cawj seiq yiengh byaek yiengh dang ndeu, byawz mbouj ciuqei couh deng fad naemz bae. Bouxhak mbaet gwn mbaet yungh le, couh mbouj miz gij sim bae dam aeu cienzcaiz. Cuh Yenzcangh de seiqvunz mbaet gwn mbaet yungh, de mbouj lau mazfanz yiengq bouxhak gangj vihmaz dawz mbaet gwn mbaet yungh dangbaenz miznaj, gij hengzdoengh saiyaix dang- baenz mbouj rox nyaenq.

Ciuhgeq vuengzdaeq lij guh daengz mbaet gwn mbaet yungh, seizneix raeuz dwg hagseng, dwg boux vunz Cungguek engqgya aeu mbaet gwn mbaet yungh、 saiyaix rox nyaenq guh daudwz biucinj caeuq raeuz gvaq swnghhoz, sevei hwngfat cij yied daeuj yied doxhuz, gyoengqraeuz swnghhoz cij ngoenz ndei gvaq ngoenz.

(Vujsenh Yen Sinhlungz Siujyoz roek nienz- gaep Vangz Cinzsinh boux lauxsae son’gyauq Lungz Ging’yiz)