Mbwn ngamq ronghyaiyai, raemxraiz henz roen cumxmbaeq raixcaix, hoeng gij hanh gwnz ndang Lungz Byauh engq dumzdamz, ndawsim de mbouj caiq ngeix gijwnq lo, da mbouj yawj coh henz, song ga buet lumj mbin, buekmingh buet hwnj bya bae. De rox bang caeggeq dwg daj diuz roen neix buetdeuz hane, caemhcaiq byaij ndaej mbouj gig gyae, baengh bonjfaenh youq Yanghgangj hag ndaej gij bonjsaeh nyingz cungq caeuq dwkgienz, wnggai doiqfouq ndaej bang caeggeq ndeu, daj ndaw fwngz gyoengqde gouq Ah Gwnh daegseiq ranz Cinz Dayenz okdaeuj.

De youh buet youh diuq, bungz roennga, de hix mbouj lai naemj, cigsoh byaij coh diuz roennou hwnj bya.

Seizneix, de gaenq lumz daxmeh de lo, hix lumz Siu Cuh lo, engq lumz Ah Gwnh dwg bouxgvan Siu Cuh lo, cij rox aeu gouq de dauqma. Ced vunz haenx yawjraen byalae couh haep ndaej saenzdwddwd, youq ndaw fwngz caeggeq lij ndaej lix?

Danghnaeuz mbouj vaiqdi gyaep hwnj gyoengqde, couh dai lo. Couhsuenq Cinz Dayenz gai reihnaz caez bae rouh Ah Gwnh, lauheiq hix cij lw geij diuz ndok Ah Gwnh doxdauq ndwi lo, cib lai bi gaxgonq boh bonjfaenh couhdwg yienghneix. Daengz seizneix lienz ndok cungj ra mbouj raen ne……

Ga Lungz Byauh menhmenh mboujyawx haxbaenh yienghde riengjret lo, de yied byaij yied gip, hoeng yamqdin cix yied byaij yied naekcaem. Moengj hanh conh hawj buhvaq cungj gyuek youq gwnz ndang, buet hwnjdaeuj gig mbouj cwxcaih, diemheiq yied daeuj yied gaenj lo, gaemz gwnz ciep mbouj ndaej gaemz laj, de baegfofo byaij, roennou hwnj bya yied daeuj yied mbouj ndei byaij lo.

De hixnaengz din fwngz caez yungh, mizseiz ca mbouj geijlai lumj duzma byaij nei hwnj ndoilingq.

De byaij menh roengzdaeuj lo, diemheiq bienq vaiq lo, doeklaeng dauqdaej byaij mbouj ndaej lo, naengh youq gwnznamh rueg hwnjdaeuj, raemxsoemj gaemz doek gaemz daj ndaw dungx ndingq okdaeuj, aek oemq sim vueng, baihnaj lumj miz ngaeuz ndaem bifefe.

Baez rueg hawj de ngeix hwnj ngoenzlwenz de baenzngoenz caengz gwn maz doxgaiq, gvaiq mbouj ndaej ndangdaej baenzneix yaez.

De cengqgengz youh ndwn hwnj- daeuj, laebdaeb byaij coh gwnz bya, hoeng byaij ndaej gig menh, song ga hainduj saenzdedded, conghhoz hawqgatgat, raemxsoemj ndaw dungx rueg caez le, lij rueg rumz dem, de saedcaih byaij mbouj ndaej lo, cij ndei youh naengh roengzdaeuj.

(caengz sat)