Lauxsae couh lumj rumz iq seizcin, vanq ceh caizhag hawj raeuz; lumj ndit seizdoeng, raeuj aen sim raeuz; engq lumj aen daeng ndeu, ciuq diuzroen baenaj raeuz. Lauxsae yijvwnz gou Suh lauxsae couhdwg boux lauxsae ndei baenzneix, naj de huzunq youh dwggyaez, bwnda ndaemndat baihlaj miz fouq lwgda unqswnh ndeu, seizseiz haeujsim gij doenghdanh dou.

Geiq ndaej ngoenzhaenx gaujsi sat, dou cingq caepcawq aemq daehsaw dauq ranz, mbwn sawqmwh doek fwnhung, doxgaiq dieggyae cungj yawj mbouj cingcuj. Gou mbouj dawz gyaepliengj, you daxmeh youq bakdou hagdangz caj gaenj lai, cingq caepcawq cung haeuj ndaw fwn bae. Couh youq seizneix, Suh lauxsae rag dawz gou naeuz：“Mwngz mbouj miz liengj, baenzneix rwed fwn haengjdingh deng fatsa, lauxsae soengq mwngz okbae ba.” Mbouj caj gou hoiz, Suh lauxsae fwngz got gou daengz henzgyawj, fwngz gang liengj, caeuq gou doxcaez byaij haeuj ndaw fwn bae. Seizneix, fwn yied doek yied hung, rumz hix yied baed yied hung. Suh lauxsae doq cengqgengz gang liengj, doq got gaenj gou youq henzgyawj de, aen liengj itcig caix coh mbiengj gou, gou deng lauxsae hoh ndaej ndei raixcaix, mbouj deng rwed. Hoeng, Suh lauxsae daengx ndang gaenq dumz liux. De soengq gou daengz henzgyawj daxmeh, mbouj caj gou caeuq daxmeh naeuz gyo’mbaiq, de gaenq cienqndang cung haeuj ndaw fwn bae lo, ganj dauqbae soengq doengzhag wnq.

Yawj ngaeuzlaeng Suh lauxsae ndaw fwn, gou raemxda doek lo, gou coh ngaeuzlaeng Suh lauxsae bae gyae haenx gungj laeng baiq mbat ndeu. Gyo’mbaiq mwngz, lauxsae ndiepgyaez.

Duzbya liz mbouj ndaej raemx, duzroeg liz mbouj ndaej ndoeng, raeuz majhung hix liz mbouj ndaej lauxsae caenhsim son’gyauq. Gou rox Suh lauxsae gyaez dou, dou hix gyaez mwngz, boux lauxsae gingqgyaez dou!

(Nanzningz Si Gyanghnanz Siujyoz Liuz Yizyingj)