Gyoengqsou bang daxmeh guh hongranz lwi? Lumjbaenz：Cat rek、baet deih、uet deih……Gou ngoenzneix dwg raiz bang daxmeh guhsaeg. Gou dwg baenzlawz guhsaeg？ Guhsaeg mizyinx lwi? Gyoengqsou daeuj dingqdingq ba.

Ngoenz ndeu, gou caeuq doengzhag bae dwkgiuz dauqma, roxnyinh buhvaq gou youh uq youh haeu, naemj guhsaeg, hoeng, gou mbouj rox guhsaeg, mbouj miz banhfap, gou cij ndaej ra daxmeh.

“Daxmeh, gou mbouj rox guhsaeg, mwngz sonson gou ba.” Gou naeuz.

Daxmeh naeuz:“Mwngz dawz buhvaq cuengq roengz ndaw doengj bae, gya raemx dumx gvaq buhvaq, cuengq di raemxyw guhsaeg, ceh buenq diemjcung.”

Buenq diemjcung daengz lo, va, buhvaq gou baenzhaenx uq, raemx cungj bienq ndaem lo. Gou cam daxmeh:“Daxmeh, mwngz vihmaz hawj gou yungh raemxyw guhsaeg ceh buhvaq buenq diemjcung gonq？” Daxmeh naeuz:“Aenvih mwngz daenj buhvaq hau, buhvaq hau saeg seuq hoj lai, ndigah ceh gonq.”

Seizneix hainduj saeg buhvaq, gou caiq gya di raemxyw guhsaeg roengz ndaw doengj bae, itcig fousaeg. Daxmeh naeuz, aeu saeg daengz buhvaq bienq hau cij ndaej. Gou ciuq daxmeh bae guh, itcig saeg, itcig saeg, fou daengz fwngz cungj naet lo, buhvaq cij saeg seuq.

Gou seizneix cij rox, gij saeh yawj cix lumj ngaih, guh cix caen hoj dangqmaz.

(Baksaek Si Yougyangh Gih Cunghvaz Siujyoz Maz Hungzgenh)