Vahbouxbien: Aen biengz Gvangjsih raeuz gvangqlangh fouqmiz, ngoenzngoenz cungj miz haujlai gojgaeq gvendaengz minzcuz doxgiet baenaj cienz okdaeuj, comzgyonj baenz rengzmbwk caez cauh ranzmbanj、ndwenngoenz gyaeundei. Daj geiz neix doxbae, bauq dou guh aen lanzmoeg“gojgaeq iq gvendaengz minzcuz doxgiet baenaj Gvangjsih”, aeu doengh aen goj iq gikcoi、raeujrub、gamjdoengh vunz haenx langhbaij gak minzcuz gih raeuz doxgyau doxrox、doxhuz doxndei, cukmaenh gij eiqsik caezcaemh Cunghvaz Minzcuz, hawj gak minzcuz lumj ngveihsigloux nei gotndaet guhdoih.

Ranz Hou Cinyungz youq Lungzswng Gak Cuz Swciyen Swsuij Yangh Bazdanh Cunh Mbanjlijbaiz, ranz de 10 vunz dwg seiq daih caemh ranz, miz Myauzcuz、Yauzcuz、Dungcuz、Bouxcuengh、Bouxgun haj aen minzcuz, cungj bau Lungzswng haj aen minzcuz cawjdaeuz liux, dwg aen ranz gak minzcuz doxaeu gig dienjhingz ndeu.

Gij goj ranz Hou Cinyungz yaek daj hajcib lai bi gaxgonq hainduj gangj. Seiz de, Hou Cinyungz daeg lwgmbauq Mbanjcuengh neix dangbing ma ranz, vunz gaisau dah Yauzcuz Majdiz Yangh ndeu hawj de guh yah. Doeklaeng songde seng le Hou Yizmung、Hou Yizlenz song dahlwg. Song dah neix majhung, Hou Yizlenz haq ok rog bae, Hou Yizmung cix aeu Vangz Cwngzgen vunz Dungcuz hwnjranz. Gvanbaz neix youh seng le Hou Gvanghyenz、Hou Gvanghcuj, song daeg neix gak riengz daxgoeng caeuq daxboh dwnghgi guh Bouxcuengh caeuq Dungcuz. Hou Gvanghcuj miz song daeg lwg, Hou Gvanghyenz baenz ranz le caiq aeu ndaej daeg ndeu. Sam daeg neix gak dwnghgi guh Yauzcuz、Dungcuz caeuq Bouxcuengh.

Aen ranz huzndei hung neix yienh’ok gij leixniemh minzcuz doxgiet gaenq roengzrag diuz meg vunzlai bae lo.

（Aen Lanzmoeg neix youz Gvangjsih Minzcuz Yenzgiu Cunghsinh gung gauj）