Daxmeh de daejww, baenzlawz hix mbouj hawj de okbae, song fwngz buekmingh got dawz de, ca mbouj geijlai yaek gvih roengzdaeuj gouz de lo.

Gij saeh sim’in cib lai bi gaxgonq couh lumj youq dangqnaj, caeggeq ciengj bouxgvan de bae, hawj de bienqbaenz yahmaiq, de soujmaiq baenzlai bi ciengx daeglwg, seizneix da raen daeglwg gaenq majhung baenzvunz, baenzlawz cuengqsim hawj daeglwg okbae mauhyiemj ne?

Lungz Byauh mbouj miz banhfap, cij ndaej dapwngq daxmeh de mbouj okbae, daxmeh de lij mbouj cuengq- sim, itdingh aeu rag dawz fwngz de, hawj de naengh youq henz congz buenx, mbouj ndaej byaij yamq ndeu.

Lungz Byauh dinghdingh naengh youq henz congz, caenhrengz caem- dingh roengzdaeuj, nyengrwz dingq gij sing baihrog.

Gyanghwnz engq caem lo, baihrog cawz le gij sing mbawfaex deng rumz raq doek raq ci ndaej yiengjsasa, maz doenghdanh hix mbouj miz lo. Haxbaenh lij miz duzma dingzdingz duenhduenh raeuq caenh he, seizneix cij lw duzbid youq gokciengz heuhcici.

“Aiq mbouj dwg sing dwkcungq ba?” Gvaq le haujlai nanz, daxmeh de guj naeuz, “duzyou baujyouh, mbouj dwg caeggeq cij ndei!”

“Aiq dwg raeuz dingq loek lo.” Lungz Byauh hix buenq saenq buenq ngeiz naeuz, “meh, mwngz laep da ninz ba.”

“Yawj conghcueng dingjranz mbwn ronghyaiyai, aiq hix yaek rongh lo, gou baenzlawz ninz ndaej ndaek?”

(caengz sat)