Ngoenzneix ngoenzseng dangj,

Lwgminz angq raixcaix,

Raeuz geij boux hwnjdaiz,

Simhai lumj vavengj.

Gij laeb dangj bonjeiq,

Ciengzseiz aeu cingcuj,

Yaek siumied dicuj,

Gujli raeuz fanndang.

Caez laebbaenz seizhaenx,

Cungj haenqrengz bae ngeix,

Fazcanj daengz ngoenzneix,

Feiq haujlai goengfou.

Boksok caeuq apbik,

Dik dwk bouxhoj haemz,

Deng apbik deng daenz,

Lajbiengz cungj miz nanh.

Gaxgonq raeuz beksingq,

Mbouj dwg mingh ndwi baenz,

Vih sevei mbouj haenq,

Lwgminz raen dwgrengz.

Seng youq sevei gaeuq,

Nyapnyuk aeuq ciuhvunz,

Vihliux geij donq gwn,

Ngoenz lienz hwnz bae guh.

Gaxgonq sevei gaeuq,

Hawj ukgyaeuj dwgrengz,

Vihliux donq gyu seng,

Deng haenqrengz baenz ciuh.

Youq seiqgyaiq lajmbwn,

Vihliux gwn dem daenj,

Dai mbouj miz dieg baengh,

Ndoet raemx hix mbouj roengz.

Dwgrengz gaej ienq boh,

Gungzhoj gaej ienq mbwn,

Haenqrengz cij miz gwn,

Hwnz ngoenz raeuz baegnaet.

Gaxgonq raeuz Cunghgoz,

Cingq dwg hoj dahraix,

Gwnz biengz gyoengqvunz lai,

Wnggai aeu geiqmaenh.

Mbangj vunz dai gwnz loh,

Miz di noh rim ranz,

Bouxhoj gag simfanz,

Ranz fouqmiz mbouj you.

Gij seiqgyaiq seizhaenx,

Saedcaih maenh mbouj roengz,

Gungcanjdangj miz goeng,

Ciuq doengxngoenz guhcingq.

Gungcanjdangj lingjdauj,

Gauj sevei cujyi,

Gij doeklaeng muzdiz,

Miz raeuz bae saedyienh.

Dwen daengz gungcanjdangj,

Gangj aencingz mbouj liux,

Lwgminz raeuz daeuj diuq,

Mbouj ndaej siuj bouxlawz.

Laebbaenz gungcanjdangj,

Guekgya gangj cwngci,

Saenqhwng gij ginghci,

Laebndei cidu raeuz.

Daih’it aen bak bi,

Muzbyauh cix saedyienh,

Lwgminz sim doxlienh,

Guekgya bienq gyaeundei.

Daihngeih aen bak bi,

Mingzbeg gij gveihva,

Caez haeujsim daeuj va,

Gingj da yawj engq gyaeu.

Daihsam aen bak bi,

Saedyienh hix ndaej dingh,

Dangjcunghyangh gaem bingq,

Itdingh ndaej saedyienh.

Gaenriengz Dangjcunghyangh,

Gvaq siujgangh swnghhoz,

Ngoenzcog raeuz Cunghgoz,

Lohloh cungj raen ndei.

Byaij diuz loh daegsaek,

Haet beij haet fouqgiengz,

Yendaiva miz yiengh,

Vunzbiengz couh angqyangz.