Saw, dwg baengzyoux ceiq ndei vunz, youq gyang saw yaek senj cek saw ceiq ndei、ceiq gyaez, caen mbouj ngaih, danghnaeuz caen hawj gou naeuz ok cek saw ceiq gyaez, haenx couhdwg 《Sanhgoz Yenjyi》 lo. Bouh 《Sanhgoz Yenjyi》 dwg gij laex “roek it” daxboh soengq hawj gou, gou gyaez de raixcaix, caemhcaiq lij bau caengz beiz ndeu hawj de dem, gou hix ciengzseiz doeg de, daj ndawde roxnyinh angqyangz caeuq hag sawda……Gou caeuq de miz haujlai saeh mizyinx, hoeng daegbied hawj gou nanzlumz dwg baez haenx gyanghwnz doeg saw.

Haemh gyaeundei ndeu, gou ngamq dajcaemx liux, cingq naengh youq henz daizsaw yawj 《Sanhgoz Yenjyi》 yinx dangqmaz, cek saw neix gou gaenq yawj gvaq haujlai baez lo, hoeng gou couhdwg cuengq mbouj roengz de, lijdwg ngoenznaengz dingj bae yawj. Yaepyet, gou gaenq yawj le song diemj lai cung lo, gou mbouj rox saek di. Mwh gou cingq yawj daengz giz yinx, sawqmwh dingqnyi sing ndeu: “Cib diemj lo, lij caengz bae ninz!” Dingq le, gou sij mbouj ndaej cuengq cek saw roengzdaeuj, bae ninz lo.

Youq gwnz mbonq, gou fan bae foek dauq, cungj ninz mbouj ndaek, ndawsim lijdwg naemj 《Sanhgoz Yenjyi》, gij cingzciet ndaw gojgaeq yinx gou, doeklaeng, gou nyaenx mbouj ndaej lo, gou laeglemx byaij coh gyaqsaw, dawz cek 《Sanhgoz Yenjyi》 caeuq aen dienhdoengz ndeu, ndoj youq laj denz yawj ndaej angq dangqmaz. Gou lau deng daxmeh rox raixcaix, hoeng baez naemj daengz de gaenq ninz ndaek couh cuengqsim roengzdaeuj, laebdaeb yawj saw. Hoeng cainanh naemj mbouj daengz, daxmeh sawqmwh daeujdaengz rug gou, mwh de yawjraen gou cingq yawj saw, doq hozhwnj dangqmaz, ndaq gou baez ndeu, gou hix mbouj miz saek di banhfap, cijndaej nyaenx dwk, cuengq cek saw roengzdaeuj bae ninz lo.

Gij gojgaeq gou caeuq saw ciengxlwenx mbouj sat, fag riengz dwk gou majhung bienq ndaej yied daeuj yied lai.

(Sinhyiz Si Cangzcingh Siujyoz Ciz Bingjyi)