Binaengz ngoenz ndwenbet,

Caez gvaq ciet angqyangz,

Nyiedbingj rang youh rang,

Bang dem bang bae cawx.

Baij bingj baiq ronghndwen,

Caez eu fwen danq dangj,

Bouxboux eu ndaej angq,

Fangzhwnz sangj gag riu.

Bouxcoz comz gangjgoj,

Dox soqhoj lwnhnyi,

Yiengj saeh angq lai di,

Aen sim liz ndaej gyawj.

Boux dog youq dieg rog,

Gag dog boux ndeu gwn,

Ronghndwen youq gyang mbwn,

Fangzhwnz raen beixnuengx.

Gyoengqvunz cuengq daeng’va,

Muengh guekgya hwngvuengh,

Ranzranz miz maqmuengh,

Youq hoengzbuengj mizmingz.

Doengzcaez gwn haeuxcaeuz,

Naeuz gwn laeuj va’gviq,

Doiq daengx ranz cungj dij,

Gij saehnieb ndaej hwng.

Daxmeh dem gouh dawh,

Naeuz dwg cawq doh gou,

Dingh aeu hawj gou louz,

Meh siengj gou dahraix.

Naeuz gou youq baihrog,

Gag boux dog ndwenngoenz,

Mbouj ndaejhoengq saek ngoenz,

Youq gwnz roen soengq hek.

Singj daeuj raemxda lae,

Youq dieggyae niemh meh,

Cungj mbouj cej saekcoenz,

Bohmeh aen nanz bauq.