Lwg roegvaiqguhvaiqguz doek- seng gvaqlaeng, daxmeh ngoenzngoenz haet ok haemh dauq, hawj gyoengqde ra gijgwn ceiq ndeigwn. Miz daxmeh saeqsim dajleix henhoh, sam duz roegvaiqguhvaiqguz iq cungj majhung lo.

Miz ngoenz ndeu, daxmeh naeuz gyoengqde:“Gyoengqlwg, seizneix sou ndaej ok baihrog bae, yawjyawj gwnz- biengz, hag saekdi bonjsaeh lo.” Sam duz roegvaiqguhvaiqguz iq dingq le buenq coenz vah baihgwnz, gikdoengh dangqmaz, buenq coenz vah baihlaj cix mbouj dingq haeuj rwz. Yiengh- neix, moix baez daxmeh okbae ra gijgwn seiz, gyoengqde couh bae gwnz diegnywj、gwnz ndoi doxmbin guh- caemz, angq dangqmaz bae. Mwh gyoengqde yawjraen doengh duz roeg wnq, gamz nyefaex guh rongz, roxnaeuz gaeb duznon iq seiz, lij rox gigi goekgoek, riu gyoengqde ngawz ne.

Miz mbat ndeu, duz rwi ndeu muengh raen sam duz roegvaiq- guhvaiqguz iq, cingq riu bouxwnq, couh naeuz:“Gyoengq roegvaiqguh- vaiqguz iq ha, lij lix couh yaek hag rox guhhong, swhgeij mbouj guh, dauqfanj riu bouxwnq, neix mbouj baenz geijlai bw.” Sam duz roegvaiqguhvaiqguz iq dingq le, nyinhnaeuz ndeiriu, sing gok hemq naeuz duzrwi:“Miz daxmeh guhhong hawj dou, mwngz youq mbwq la, guenj saeh dou baenzlai!”

Seizneix youh miz duz roegvenz rox ciengq go ndeu mbin gvaqdaeuj, de aeu sing go ceiq ndeidingq, gienq naeuz sam duz roegvaiqguhvaiqguz iq:“Couh yaek fwn doek lo, vaiq baema gya maenh aen ranz sou ba, mboujnex yaek deng rumz bongj deuz bw!” Roegvaiqguhvaiqguz iq ndatheiq han naeuz:“Miz daxmeh gya maenh hawj dou, mbouj yungh mwngz guenj baenzlai.”

Youh miz duz roeggapbeg ndeu mbin gvaqdaeuj lo, naeuz sam duz roegvaiqguhvaiqguz:“Gyoengq lwg- nyez, vaiq bae ra saekdi gijgwn rom comz roengzdaeuj ba, mboujnex ngoenzfwn yaek deng iek bw.” “Miz daxmeh ra gijgwn hawj dou, dou mbouj ndaej deng iek law.” Sam duz roegvaiqguhvaiqguz iq vanzlij mbouj dingq gienq saekdi caemhcaiq gig simfanz dem.

Sawqmwh, rumz haenq bongj hwnj, mbwn doek fwnraq. Sam duz roegvaiqguhvaiqguz iq dauqma ndaw- ranz. Ciengz aen ranz deng rumz bongj lak lo, daxmeh vanzlij caengz dauqma ranz. Sam duz de youh nit youh iek, doxing youq ndaw gizgungx ndeu, deq daxmeh dauqma.

Gvaq le yaep ndeu, daxmeh ndang naiqnueknuek, soemh fwnraq dauqma daengz ranz. Caenhguenj bwn de deng raemxfwn rwed mbaeq liux lo, hoeng ndaw bak vanzlij gamz miz haujlai duznonlwg.

Roegvaiqguhvaiqguz iq baez rumh hwnjbae, gijgwn ndaw bak daxmeh, deng ciengj bae seuqsat. Gwn imq le, couh doxing youq lajfwed daxmeh, ninzndaek fodfod lo.

Ngoenz daihngeih, fwn vanzlij doek mbouj dingz. Daxmeh baenz- bingh lo, daengx ndang saenzdedded. De couh naeuz duzdaeuz:“Mwngz bae fuz naj ciengz deng rumz bongj lak haenx hwnjdaeuj, mboujnex raeuz couh yaek deng dainit lo.” “Daxmeh, gou hix gig nit, mwngz yawj, gij fwed gou cungj iet mbouj ndaej soh lo, baenzlawz bae fuz faqciengz ha!” Duzdaeuz han naeuz.

Daxmeh gyangz gaemz heiq naekgywg ndeu, doiq duzngeih naeuz:“Lwg ha, mwngz bae henz dah aeu di raemx ndeu ma, daxmeh fatndat, hoz cungj hawq yaek ok hoenz lo.” “Daxmeh, gij rumzraq baihrog, yaek bongj gou roengz ndaw dah bae bw, mwngz vanzlij nyaenx saekdi gonq ba.” Duzngeih naeuz.

Daxmeh roegvaiqguhvaiqguz mbouj miz banhfap, cij ngauzgyaeuj sadsad.

Youh gvaq ngoenz ndeu, mbwn gvengq lo. Hoeng, daxmeh bingh engq naek lo. Sam duz lwg cungj hemq dungx iek, daxmeh hix siengj gwn saekdi doxgaiq. Yienghneix, de couh naeuz duzsam naeuz:“Lwg ha, daxmeh seizneix iek lo, mwngz ndaej bang daxmeh, ra saekdi doxgaiq gwn lwi?” “Mbouj ndaej ha, daxmeh, gou hix song ngoenz mbouj ndaej gwn doxgaiq lo, gou deng iek ndaej ndwn cungj ndwn mbouj hwnjdaeuj lo.” Daxmeh muenghyawj gyoengq lwg haengj gwn gik guh、damdoz youq onj, ndawsim gaek dangqmaz: Doenghbaez couh mbouj wngdang ungjcungh gyoengq lwg baenzlai. De muenghyawj sam duz lwg, ndawsim youh dot youh get, coh gyoengqde danq gaemz heiq naekgywg ndeu, gaenlaeng saenq gij rengz daengx ndang, mbe fwed mbin deuz lo.

Gyoengq roegvaiqguhvaiqguz iq raen neix, doq bae gyaep daxmeh, daejnganga hemq gok naeuz:“Daxmeh, mwngz dauqma ha! Dou yaek yungh gij nyefaex ceiq gietsaed, guh ranz moq hawj mwngz, yaek aeu raemx- mboq liengzsisi, hawj mwngz gaij hozhawq, yaek bae ra gij doxgaiq ndeigwn, hawj mwngz gwn imq.” Hoeng daxmeh cix mbouj caiq dox- dauq.

Daj baezneix hwnj, sam duz roegvaiqguhvaiqguz iq mbouj miz daxmeh ganq lo, gyoengqde ienqhoij swhgeij doenghbaez mbouj roxsoq gik guh saeh, gag ra gwn gag guh rongz ciengx bak bonjfaenh lo.