Singhgiz roek banhaet, gou caeuq daxmeh caez bae youz gai, gwnz roen bungz raen aen diemqdangauh ndeu, gwnz bohliz nem miz vacueng gyaeundei raixcaix! Gou naeuz：“Daxmeh, gou hix naemj daet gij vacueng gyaeundei baenzneix!”

Gwnz roen dauq ranz, daxmeh cawx ceijsaek caeuq fag geuz hawj gou, baez daengz ranz dou couh hainduj daet vacueng lo. Daih’it aeu ok mbaw ceijsaek saeknding ndeu, doiq gak boeb, daet ok aen hingzseiqcingq ndeu. Caiq boeb baenz aen ciggak hingzsamgak ndeu, ciep dwk aeu aen gakraeh boeb daengz mbiengj haenx, lingh aen gakraeh hix baenzneix guh, yienghneix couh boeb baenz aen yiengh hojgi ndeu. Doeklaeng caiq aeu “hojgi” doiq boeb, boeb ceij couh guhsat lo!

Cungjsuenq ndaej yungh fag geuz iq saekmaeq gou lo, gou gaem fag geuz, cingq naemj daet, daxmeh guhmuengz naeuz：“Dahniq, gaej gip, raeuz aeu veh aen doz gyaeundei okdaeuj gonq, yienghneix cij daet ndaej ngaih.” Gou youq gwnz ceijsaek boeb ndei haenx, yungh bit menhmenh veh, gou veh le haujlai doz caeuq doenghduz iq. Haeujsim lo, doenghgij doz caeuq doenghduz iq neix ngamq yungh veh buenq aen couh ndaej lo! Cungjsuenq ndaej hainduj daet lo, gou gaem hwnj fag geuz iq, riengz doz couh daet hwnjdaeuj lo. Aeya, baenzlawz daet mbouj doengh ne? Daxmeh naeuz dwg gou rengz iq lai lo, couh daeuj bang gou caez daet. Song dou caez roengzrengz, vacueng cungjsuenq daet ndei lo, gou dawz ceijsaek mbehai, duj vacueng gyaeundei ndeu okdaeuj lo, baihgwnz miz yiengh aen simndei、miz duzdouq iq, lijmiz haujlai doz mizyinx. Doeklaeng, gou aeu de nem youq bohliz aen cueng ndaw ranz.

Daxgoeng daxbuz dauqma le, yawjraen gij vacueng gou daet haenx, cungj haenh gou daet ndaej ndeiyawj.

(Cezgyangh Swngj Hangzcouh Si Yasah Daih’it Siujyoz Sih Yigoj)