Seizhah banhaemh, ndaw siujgih caemrwdrwd. Go’nywj ninz lo, gofaex hix ninz lo.

Gou caeuq daxmeh doq yietliengz doq yawj ndaundeiq. Gou ngiengx gyaeuj yawj mbwn, mbwn gyanghaemh gvangqlanghlangh, lumj gaiq baengzmuq saekndaem hungloet ndeu nei, geij aen ndaundeiq yaeprongh, lumj dwg naed cuenqsig sieng youq gwnz baengzmuq, gyaeundei raixcaix! Gou yawj ndaej yinx dangqmaz, sim naemj: Doenghgij ndaundeiq neix doxliz baenzhaenx gyae, seih mbouj seih gadog dangqmaz？ Gyoengqde seih mbouj seih baengh gijmaz fouzsienqdienh lienzhaeh ne？

Sawqmwh, dieggyae aen ndaundeiq iq ndeu yaep lwgda iq, diuqbeiz dongx gou. Yi, de baenzlawz lij yied daeuj yied liz gyawj gizneix？ Gou gikdoengh ndwn hwnjdaeuj, rag daxmeh naeuz：“Daxmeh, vaiq yawj, aen ndaundeiq haenx cingq doengh, dwg ndaundeiqbaefinz lwi?” Gou doq hemq doq caepcawq mbaenj. Daxmeh riuhaha hwnjdaeuj：“Lwg ngunh, haenx dwg aen feihgih mbin youq gwnz mbwn.” Gou nyaujnyauj gyaeuj, riuhehe hwnjdaeuj.

Gwnz mbwn, mehbuz ronghndwen hix riu gungj hwet lo, ndaundeiq gyanghaemh seizhah caen gyaeundei ha!

(Gyanghsuh Swngj Haijmwnz Si Dunghcouh Siujyoz Gungh Lozyauz)