Bae ndaw fangzhwnz ra ba, youq fangzhwnz ndawde Siu Cuh cij duh bonjfaenh, rog loq dwg mehyah Ah Gwnh!

Doenghbaez, de baez ninz youq gwnz congz couh rox fangzhwnz, dandan ngoenzneix mbouj ndaej, meglwed goekrumz baez diuq baez diuq, lumjnaeuz miz song duz daek youq ndaw uk de dikdaebdaeb, daengx gyaeuj lumj gwq bienq bongq、bienq gvangq, laep lwgda lij yawj ndaej raen dangqnaj miz fouzsoq aen gvaengx caeuq gaiq soiq, baenq bae baenq dauq, song yiengh neix lumj cungj aeu geuh hai buengzda de nei, yaek daj ndaw lwgda de roemx haeuj ndaw ukgyaeuj bae.

Ah Gwnh ced vunz haenx, dwg gij fukheiq ciuh lawz yo roengzdaeuj ne? Seiz iq bohmeh de couh gig mbenj de, lumj aen dijbauj nei, ndaej sam bi le lij caengz gekcij, ndigah gangj vah lumj mehmbwk, mbouj miz saekdi yiengh bouxsai, engq mbouj aeu gangj mbei iq lumj duznou lo, dingqnyi byajraez couh rox daej heuh daxmeh.

Bihaenx de ndaej 15 bi, Lungz Byauh caeuq de daengz ndaw dah bae youzraemx, duz byalae daj henz ndang de youz gvaq, de couh haep ndaej daengx ndang saenzdwddwd, ca mbouj geijlai couh caem roengz laj raemx bae. Danghnaeuz mbouj dwg Lungz Byauh rag de baez he, couh mbouj dwg gwn geij gaemz raemx ndwi lo, doeklaeng caezgya gwq dawz gienh saeh neix daeuj riu de, de lij euq naeuz dwg bungz duz ngwzboengz ne! Couhsuenq seizde yawj loek lo, yawj duz byalae baenz duz ngwzboengz, hix mbouj aeu lau ndaej daengx ndang unqnemnem ba! (caengz sat)