Bonjbauq siusik（gicej Vangz Hauyinz) 8 nyied 20 hauh, “ciengxlwenx riengz aendangj byaij——aen saw veh doxdax minzcuz doxgiet baenaj Gvangjsih”aen yizsiz fat ciengj caeuq langhbaij cozbinj ndaej ciengj youq Swcigih Duzsuhgvanj haibanh. Hozdung youz Swcigih Minzcunghveij cawjbanh, Gvangjsih Minzcuz Cuzbanjse ciepbanh. Mbat doxdax neix gungh sou ndaej 6202 fuk cozbinj, miz 96 fuk aeu ndaej ciengj. 8 nyied 20 daengz 9 nyied 20 hauh, gij cozbinj ndaej ciengj couh youq Swcigih Duzsuhgvanj langhbaij okdaeuj.

Boux dangjcuj cwngzyenz、bouxfucujyin Swcigih Minz- cunghveij Veih Yungjhungz haenhnaeuz aen doxdax neix gig ndei. De naeuz, doengh fuk saw veh neix baijok le gij caencingz gak minzcuz, langhbaij gij haedsim gyacizgvanh seveicujyi dazyinx cauh’ok gij doxgaiq cingsaenz vwnzva, caencingq gangj ndei gij goj Cungguek, gangj ndei gij goj Gvangjsih caeuq gij goj minzcuz doxgiet baenaj gih raeuz.

Yienhciengz, lai fuk saw veh lumj “Gyaeundei Cungguek”“Lajmbanj Hwnghoengh”“Aenbiengz Huzndei” sij roxnaeuz veh ok seizdaih moq, gangj gij bienqvaq gak hangznieb、gak minzcuz doxhuz doxndei、 beksingq gvaq ndaej an’onj, langhbaij gij hongsaeh minzcuz doxgiet baenaj gih raeuz guh’ok makbaenz ndei raeuh, caiq cukmaenh gij eiqsik caezcaemh Cunghvaz Minzcuz, hawj vunzlai dawz minzcuz doxgiet cuengq haeujsim, caiq guh ndaej daengz.