“De bae ndaw cin cawx doxgaiq lo.” Daegsam dap le coenz he.

“W, sou dwg doengz bi ba? Gou ndaejgeiq doenghbaez mwngz gwq daeuj ra Ah Gwnh bae youzraemx, hei hei! Seizneix de ndaej guh boh lo! Lungz Byauh, baezneix dauqma, mwngz hix wnggai aeu yah lo, yienznaeuz bineix dajsou mbouj ndei, dairengx, mboujgvaq ranz mwngz vunz noix, ndwenngoenz ndei gvaq lai lo……”

Ndaw rwz Lungz Byauh yiengj- foedfoed. Gij vah Cinz Dayenz lumj duzdinz daengxgyoengq okdaeuj doxlwnz youq simdaeuz de ndat, hanh hainduj daj gwnz najbyak de baenz naed baenz naed doek roengzdaeuj.

Danghnaeuz caiq naengh roengz- bae, de yaek fatbag lo, sikhaek ndwn hwnjdaeuj naeuz miz saeh dauqranz gonq, dawz faggvak yamq hung byaij coh rog douhung bae.

“Lajbyonghngoenz caj mwngz daeuj ha!” Daegsam soengq de daengz rog douhung naeuz.

“Ndei, gou daeuj.”

Gangj ndaej swnhbak, hoeng aeu guh ndaej daengz hoj raixcaix!

Bouxgyaez bienqbaenz le yah bouxwnq, gaenq hawj Lungz Byauh roxnyinh sim’in lo, engq mbouj aeu gangj lij caeuq bouxwnq seng le daeglwg he dem. Ngoenzneix guhlaeuj angqhoh lwgnding ndaej rim ndwen, engq hawj Lungz Byauh roxnyinh simcieg lumj deng fagcuenq camx gvaq nei, yied ngeix yied simget, yied ngeix yied haemzgaet, de baenzlawz miz mbei bae ranz Cinz Dayenz gwn laeuj ne?

Ma daengz ranz, de vut faggvak caeuq mauhdiemx youq laeng dou, couh ninz youq gwnz congz, roengzrengz haep buengzda, mbouj hawj raemxda conh okdaeuj.

De dauqngeix song bi gaxgonq, haenzdah gwnz bya, cingzeiq doxhab, song sim doxnem, duz ngwzcaetyamq hawj de caeuq Siu Cuh dox baenz bouxmizaen. Siu Cuh riengx raemxda bang de sup lweddoeg, couh lumj youq dangqnaj, gij baksieng gwnz gahengh, naeuh le yaek ndaej song bi, daengz seizneix lij miz gaiq gyaep ndaem he lij caengz doek roengzdaeuj, byawz rox de cix baenz lwgbawx ranz Cinz Dayenz, buet haeuj le ndaw rungj Ah Gwnh lo!

De gungj gahengh, iet fwngz lumhlumh gaiq gyaep ndaem gwnz ga, seiqhenz ndumj miz di humz, roengzrengz bae nyaenx, lumj lij miz di in.

In? Caiq in hix mbouj beij sim’in lumj deng fagcuenq camx gvaq nei, de youh dauqngeix song bi gaxgonq, gij doeg ngwzcaetyamq haenq yaek vutmingh, danghnaeuz seizde aen bak Siu Cuh miz giz buq, roxnaeuz heuj caeuq noh ndaw bak mbouj nem maenh, aeu bak sup lweddoeg, baez mbouj haeujsim hix rox aeu mingh de bae, caeklaiq lumj miz bouxsien bangfwngz nei, songde cungj ndaej lix!

——Cijaeu mwngz ndaej lix, gou lij goq maz dem?

——Mwngz——caen simndei, gou wnggai baenzlawz gangj?

——Gaej gangj vah, gou rox sim’eiq mwngz……

——Gou hix rox……

(caengz sat)