Byawz ndaej rox,

Seizde mwngz daj aen ruz nding Gyahhingh Nanzhuz hwnjdin,

Cibngeih bouxcoz,

Daj gizneix ndaem aen ceh gwzming,

Daj gizneix mbouj goq mingh bonjfaenh,

Vih daengzcog Cungguek caeuq lwgminz,

Haenqrengz buekguh.

Byawz liuh ndaej daengz,

Aen ruz nding iqetet neix,

Lumj aen gyoivenj,

Coux miz aen loqsiengj hungmbwk.

Ngamj gvaq bak bi ndwi,

Seizneix mwngz gaenq majhung, ndwn hwnjdaeuj lo,

Caemhcaiq lwenqda seiqgyaiq.

Mbouj rox gwn le geijlai haemzhoj,

Mbouj rox lae le geijlai lwedhanh,

Mbaw geiz fagliemz caeuq fagcuiz,

Gaenq baek rim gwnznamh Cungguek.

Seizgonq lumj gyanghaemh laepngaungau,

Iet fwngz cungj yawj mbouj ndaej raen,

Hemq swenj hix mbouj miz byawz dam,

Mbouj rox daengzcog dai roxnaeuz lix,

Caih bouxyak bouxrwix hangz dub.

Gyo miz mwngz,

Seizneix lumj ndit gyanghaet raeujrubrub,

Lwgminz Cungguek dauqdaej ndaej guh bouxcawj lo.

Ndwenngoenz diemzdwx gvaq bouxsien,

Aen hwet iet ndaej sohrwdrwd,

Byawz gamj hangz gamj hat,

Lwgminz Cungguek couh rox fanjgang.

Aen ruz nding,

Yienznaeuz iqetet,

Mwngz cix dwg bogfeiz Cungguek,

Ciuq rongh diuz roen gwzming hoj byaij coh naj.

Mwngz daj Gyahhingh Nanzhuz hwnjdin,

Gwn le geijlai haemzhoj,

Sai le geijlai goengrengz,

Gij simnduj caeuq sawjmingh,

Ciengxlwenx mbouj lumz,

Cauh aen daengzcog ronghsagsag.

Ha, ruz nding,

Dazyinx lwgminz Cungguek yamqdin byaij coh naj.

Gij baenzgoeng dangqnaj,

Cij dwg hainduj,

Mwngz lij laebdaeb haenqrengz,

Saedyienh Cunghvaz Minzcuz fukhwng!