Daeglaux daegsam Cinz Dayenz cungj daengz ndaw ding daeuj yawj Lungz Byauh lo, cij mbouj raen daegseiq Ah Gwnh daeuj, Lungz Byauh sim luenhnyaunyau deq, maqmuengh Siu Cuh ndaej ndwn youq dangqnaj, hoeng youh lau raen Siu Cuh. Ienqhaemz caeuq ngeixniemh youq ndawsim de dongjgaengaen, gag yawjsiuj bonjfaenh caeuq siengsim hawj saeknaj de bienq ndaej hausaksak, hoeng de lij aeu cangguh miz najriu caeuq bohlwg Cinz Dayenz gangjgoj.

“Dingqgangj mwngz bae Yangh- gangj lo? Dahraix?” Daegsam cam.

“Caen bae lo!” Lungz Byauh sim ngunh uk luenh dap naeuz:“Yanghgangj caen nauhyied!”

“Mwngz youq Yanghgangj guh maz? Song bi mbouj miz di siusik dauq!” Daeglaux cam.

“Hei! Loenghloengh fagcungq, dwkdwk gienz, mbouj miz maz okcot, cungj siengj dauqma, baihde cungj liz mbouj ndaej……”

“Mwngz rox loengh cungq?” Cinz Dayenz doeksaet cam.

“Cungqraez, cungqdinj, lienz nyingz, dan dwk, hei hei. Yungzheih dangqmaz ne!”

Bohlwg Cinz Dayen doxyawj, daihgya cungj gig mbouj cwxcaih.

“Lungz Byauh ha!” Cinz Dayenz cit gaemz doengzien ndeu, menhmenh byoq okdaeuj, gij sing daj ndaw ien hoenzfonfon cienz okdaeuj,“baezneix dauqma le couh mbouj aeu caiq lizhai lo! Meh mwngz ndangdaej mbouj ndei, mwngz guh lwg wnggai youq ranz ganq de goq de.”

“Gyo’mbaiq daxlungz, nienzco bang fwngz ranz gou, gouq meh gou lo……”

“Ranz vunz he, gaej yienghneix gangj!” Cinz Dayenz yaengx doengzien dajduenh coenz vah Lungz Byauh,“lajbyonghngoenz daengz ndawranz daeuj nauhyied yaep he ba, ngoenzneix lan daihcib gou ndaej rim ndwen lo, mwngz lauheiq lij caengz rox ba, couhdwg daegseiq gou Ah Gwnh—— Yi, Ah Gwnh ne?”

(caengz sat)