Mbwk:

Vadauz nding le va’maenj yo,

Gingjsaek gyaeundei youh caiq dauq,

Gyo’mbaiq aendangj ndei lingjdauj,

Aen mauh gungzhoj gou ndaej duet.

Sai:

Mwngz ndaej duetgungz sim gou angq,

Guek raeuz dangqnaj caen dwg hwng,

Yienghyiengh souh’ik miz gou mwngz,

Cungj daengj mehfwngz haenh mbouj dingz.

Mbwk:

Haeux ngaiz lai gwn mbouj lau heiq,

Ndwenngoenz seizneix cibfaen ndei,

Raemx dienh goengloh daengz ranz caez,

Yienghyiengh dou cungj ndaej yiengjsouh.

Sai:

Cwngzcwz aendangj ndei raixcaix,

Vunzlai cungj ndaej duet mauhgungz,

Beixnuengx bouxbya caeuq bouxrungh,

Vunzvunz miz gwn youh miz daenj.

Mbwk:

Raeuz ndaej gijndei cungj aeu rox,

Hwnjdangz mienx cienz doq miz gwn,

Hawj lwg maj ndaej lumj faex mwn,

Haenqrengz fwndou caux daengzcog.

Sai:

Dahnuengx gangj vah cungj dwg caen,

Gij aen aendangj raeuz aeu geiq,

Ndwenngoenz lwgminz saedcaih ndei,

Goenglauz aendangj beij mbwn hung.

Mbwk:

Va rang hailangh mak baenz lai,

Rumzcin fwnmoenq caiq daengz biengz,

Aendangj yinghmingz lwgminz riengz,

Aencingz aendangj cien bi geiq.

Sai:

Gungcanjdangj naeuz raeuz duetgungz,

Vahgyaj vahcaen cungj ndaej raen,

Siujgangh sevei ndaej cauxbaenz,

Lumj aen daengdap rongh gwnz mbwn.

Caez eu:

Caezgya sim gyaez gungcanjdangj,

Daengngoenz ndit angj rumzraeuj ci,

Doxdaz gaem fwngz caux fouqmiz,

Vunzlai docih dangjcunghyangh.